აშშ-ის ვიცე-პრეზიდენტი ჯეი დი ვენსი აცხადებს, რომ ბოლო კვირების განმავლობაში რუსულმა მხარემ უარი თქვა უკრაინასთან ორმხრივ და ამერიკელებთან სამმხრივ შეხვედრებზე. ამის შესახებ ვენსმა Fox News-თან ინტერვიუში განაცხადა.
ვენსმა კომენტარი გააკეთა აშშ-ის პრეზიდენტ დონალდ ტრამპის ბოლოდროინდელ განცხადებებზე, რომლებშიც მან კრიტიკულად შეაფასა რუსეთის მდგომარეობა და ივარაუდა, რომ უკრაინას შეუძლია რუსეთის მიერ ოკუპირებული ტერიტორიების დაბრუნება.
მისი თქმით, ასეთი განცხადებები გამოწვეულია „ადგილზე რეალობის შეცვლით“, სადაც რუსეთი კარგავს ცოცხალი ძალის დიდ რაოდენობას და არ აქვს მნიშვნელოვანი ტერიტორიული მიღწევები.
„ჩვენ მშვიდობის ერთგულები ვრჩებით, თუმცა ამისთვის ორივე მხარის სურვილია საჭირო. და სამწუხაროდ, ბოლო რამდენიმე კვირის განმავლობაში ჩვენ ვხედავთ, რომ რუსები უარს ამბობენ უკრაინელებთან ორმხრივ შეხვედრებში მონაწილეობაზე.
ისინი უარს ამბობენ მონაწილეობა მიიღონ ნებისმიერ სამმხრივ შეხვედრაში, სადაც პრეზიდენტი [ტრამპი] ან ადმინისტრაციის სხვა წევრი შეიძლება დაჯდეს რუსებთან და უკრაინელებთან ერთად.
ვენსმა რუსეთს მოუწოდა, „გამოფხიზლდეს და შეეგუოს რეალობას“, რომ ისინი ბევრ ადამიანს კარგავენ და „სანაცვლოდ არაფერი აქვთ“.
„კიდევ რამდენი ადამიანის მოკვლას აპირებენ ისინი ადგილზე ძალიან მცირე, თუ საერთოდ რაიმე, სამხედრო უპირატესობის მოსაპოვებლად? ჩვენი პოზიცია, რა თქმა უნდა, ისაა, რომ გავაგრძელებთ მშვიდობისთვის მუშაობას და ვიმედოვნებთ, რომ რუსები საბოლოოდ გამოფხიზლდებიან და ადგილზე რეალობას დაინახავენ,“ - განაცხადა ვენსმა.
