მე კიდევ ერთხელ არ მომწონს ის, რომ პროპორციულზე არ გადავდივართ შემდეგი არჩევნებიდან, თუმცა პატივს ვცემ თითოეული თანაგუნდელის პოზიციას, - ამის შესახებ პარლამენტის თავმჯდომარე ირაკლი კობახიძემ "რუსთავი 2"-ის გადაცემა "არჩევანში", საარჩევნო სისტემაზე საუბრისას განაცხადა.
მისივე თქმით, მმართველ გუნდში პროპორციულ სისტემაზე გადასვლის მოწინააღმდეგები მხოლოდ მაჟორიტარები არ არიან. როგორც პარლამენტის თავმჯდომარემ აღნიშნა, უმრავლესობის ნაწილი შერეული სისტემის მომხრეა, რადგან სტაბილურობის გარანტად ამას ხედავენ.
კობახიძის განცხადებით, ოპოზიციას 2016 წელს მხარი რომ დაეჭირა შესაბამისი საკონსტიტუციო ცვლილებებისთვის, დღეს სისტემის შემობრუნების საკითხი არ დადგებოდა.
„ოპოზიციამ დაუშვა ძალიან მძიმე შეცდომა, მინიმუმ, შეცდომა უნდა ვუწოდოთ ამას და დღეს, რეალურად, ჩაგვაყენა კონსესუსის მიღწევის სირთულის კუთხით, უმრავლესობის შიგნით ისეთივე რთულ მდგომარეობაში, როგორშიც ვიყავით 2015-2016 წელში“, - აღნიშნა ირაკლი კობახიძემ.
ის აქვე გამორიცხავს, რომ რომელიმე პოლიტიკური პარტია კიდევ ერთხელ, 116 დეპუტატით შევიდეს პარლამენტში.
მან კიდევ ერთხელ აღნიშნა, რომ მომდევნო საპარლამენტო არჩევნები შერეული სისტემით ჩატარდება, თუმცა ბარიერი 3%-მდე დაიწევს.
„თუ რეალურად პარტია არის პარტია, მას უნდა ჰქონდეს 50 000 ხმის მიღების რესურსი“, - დასძინა ირაკლი კობახიძემ.
