ჯანმრთელობის დაცვისა და სოციალურ საკითხთა კომიტეტის სხდომაზე საქართველოს კანონის პროექტი „ელექტრონული დოკუმენტისა და ელექტრონული სანდო მომსახურების შესახებ“ და მისგან გამომდინარე კანონპროექტები განიხილეს.
მომხსენებლის, საქართველოს იუსტიციის მინისტრის პირველი მოადგილის, ალექსანდრე ბარამიძის განცხადებით, პრინციპული სიახლეა თავად კანონპროექტი „ელექტრონული დოკუმენტისა და ელექტრონული სანდო მომსახურების შესახებ“, ხოლო მის თანმდევ კანონპროექტებში ტექნიკური ცვლილებები შედის.
ალექსანდრე ბარამიძის თქმით, დღეს მოქმედი „ ელექტრონული ხელმოწერისა და ელექტრონული დოკუმენტის შესახებ“ საქართველოს კანონის მიხედვით, ელექტრონული ხელმოწერა, ძირითადად, გრაფიკული ხელმოწერის სკანირებული ვარიანტია, რომლის ავთენტურობის შემოწმება საკმაოდ რთულია.
„ახალი კანონის იდეა სწორედ ისაა, რომ ელექტრონული ხელმოწერის ცნებას ის აბსოლუტურად სხვანაირად ითვალისწინებს და განმარტავს. ახალი კანონით, ელექტრონული ხელმოწერა რაიმე გრაფიკული ნიშანთა სისტემა არ არის, ეს არის ბინარულ ნიშანთა, ნულების და ერთიანების კომბინაციებისგან შემდგარი სისტემა“ - განაცხადა იუსტიციის მინისტრის პირველმა მოადგილემ.
მისივე თქმით, ელექტრონულ დოკუმენტბრუნვაში ჩართულ პირებს უნიკალურ ბინარულ კოდს ე.წ. სანდო მომსახურების მიმწოდებელი გადასცემს. რაც შეეხება სანდო მომსახურების მიმწოდებელს, ალექსანდრე ბარამიძის განცხადებით, კანონით გაწერილია, რომ სანდო სერვისების მიმწოდებელმა უნდა გაიაროს ავტორიზაცია იუსტიციის სამინისტროს სსიპ მონაცემთა გაცვლის სააგენტოში.
სახელმწიფო, ასევე, ახორციელებს ზედამხედველობას მის მიერ უკვე ავტორიზებულ პირებზე, რათა მათ სანდო მომსახურებები იმ მოთხოვნების შესაბამისად განახორციელონ, რომელსაც სახელმწიფო დაადგენს. მოთხოვნები ტექნიკურ რეგლამენტში გაიწერება, რომელიც სრულ შესაბამისობაში იქნება ევროპულ დირექტივებთან.
კანონპროექტის თანახმად, კვალიფიციურ ელექტრონულ ხელმოწერას ისეთივე იურიდიული ძალა აქვს, როგორიც მატერიალურ დოკუმენტზე მატერიალურ ხელმოწერას.
ალექსანდრე ბარამიძის განცხადებით, კანონის ამოქმედება ხელს მნიშვნელოვნად შეუწყობს ბიზნესის განვითარებას. „ამგვარად ავტორიზებული ხელმოწერები და შტამპები, რომლებიც სანდო და მხარეების მიერ შემოწმებადი იქნება, განაპირობებს იმას, რომ ყოველ ცალკეულ შემთხვევაში, როდესაც, მაგალითად, ქართველი ბიზნესმენი, ან ქართული სახელმწიფო ორგანო გარკვეულ ოფიციალურ მიმოწერაში ან ხელშეკრულების დადების პროცესში იმყოფება სხვაგან მყოფ კონტრაჰენტთან, მას არ მოუწევს ადგილზე წასვლა ან სადმე ნეიტრალურ ტერიტორიაზე შეხვედრა, ფაქსის ან ელექტრონული ფოსტის მეშვეობით დასკანერებული დოკუმენტის გაგზავნა, რომლის ავთენტურობის შემოწმება ობიექტურად შესაძლებელი არ არის. ეს უკვე დროის და სახსრების ეკონომიაა“, - აღნიშნა ალექსანდრე ბარამიძემ.
იუსტიციის მინისტრის პირველი მოადგილის განცხადებით, უკანასკნელი წლების განმავლობაში, საქართველომ ელექტრონული დოკუმენტბრუნვის მიმართულებით, მნიშვნელოვან წარმატებას მიაღწია.
