ტურიზმის სექტორის სტიმულირება ნებისმიერ ქვეყანას სხვებთან შედარებით კონკურენტუნარიანს ხდის, - ასე აფასებს „პროთრეველის" დამფუძნებელი და ექსპერტი ტურიზმის საკითხებში მაია სიდამონიძე თურქეთის მიერ დაწყებულ ახალ კამპანიას.
თუ რა გავლენას მოახდენს თურქეთის მთავრობის მიერ ტურისტული კომპანიების წამახალისებელი კამპანია - 6000 დოლარი შევსებულ თითოელ თვითმფრინავზე - სიდამონიძე განმარტავს, რომ როცა მთავრობა კონკრეტულ სააგენტოებს ასეთი ტიპის წამახალისებელ თანხას სთავაზობს, ტუროპერატორები უფრო ორიენტირებულები არიან გაყიდონ არა სხვა ქვეყნების მიმართულებები, არამედ მეტი რეკლამა და პრომოუშენი სწორედ ასეთ ქვეყანას გაუწიონ
.
- რა გავლენას მოახდენს საქართველოს ტურიზმზე თურქეთის მთავრობის გადაწყვეტილება? ამ ფონზე ტურისტული ნაკადის კიდევ უფრო შემცირებას ხომ არ უნდა ველოდოთ?
- ასეთ შემთხვევაში საქართველოს მსგავსმა ქვეყნებმა კონკრეტულ სამიზნე ბაზრებზე კონცენტრირება უნდა მოახდინონ და მეტი ფული ჩადონ მარკეტინგში. მარკეტინგული კამპანია ისე უნდა იყოს დაგეგმილი, რომ ტურისტს, რომელსაც საქართველოში უნდა წამოსვლა, სააგენტომ მისი გადაბირება ვერ უნდა შეძლოს.
- როდესაც ამბობთ, რომ გააქტიურდეს მარკეტინგული კამპანია, ცხადია ეს მეტ დანახარჯებსაც საჭიროებს. თქვენც იყავით ტურიზმის ეროვნული ადმინისტრაციის ხელმძღვანელი, იცნობთ სტრუქტურას, ბიუჯეტს... არის ამის საშუალება?
- დღეს ტურიზმის ეროვნულ ადმინისტრაციას 2-3 ჯერ მეტი ბიუჯეტი აქვს, ვიდრე იმ დროს, როდესაც მე ამ ადმინისტრაციის ხელმღვანელი ვიყავი. ჩემი ხელმძღვანელობის პერიოდში პრიორიტეტულ და სამიზნე ბაზრებზე სწორი მარკეტინგული გათვლებისა და კვლევების შედეგად ვახერხებდით საკმაოდ დიდი კამპანიების წარმოებას. აქედან გამომდინარე, ყველაფერი არსებული რესურსების ფარგლებში უნდა მოხდეს, მაგრამ სწორედ ამიტომაა მნიშვნელოვანი კვლევების ჩატარება და იდენტიციფირება, რომ იმ ბაზრებზე სადაც არის პოტენციალი და რომელი ბაზრებიდანაც შეიძლება მოზიდვა, ჩაიდოს ფული და გაკეთდეს სწორი მარკეტინგული კამპანია.
- თუ ბიუჯეტი და ფული არის, არის კი მონდომება ტურიზმის ეროვნული ადმინისტრაციის ახალი მენეჯმენტიდან?
- ვფიქრობ, რომ ქვეყანაში სხვა, სიღრმისეული პრობლემებია და მთავრობა ნაკლებადაა ორიენტირებული კონკრეტულად ტურიზმის მიმართულებაზე. თუმცა გარკვეული პრობლემების, მათ შორის ექსპორტის შემცირებისა და ლარის გაუფასურების ფონზე, ტურიზმი პირიქით, პრიორიტეტი უნდა იყოს.
- მაშინ რატომ არ არის ტურიზმი პრიორიტეტი, ხელისუფლებას სათანადო ცოდნა და განათლება არ აქვს?
- ხშირ შემთხვევაში ბევრ ქვეყანაში ტურიზმი სერიოზულ სფეროდ არ აღიქმება და ჰგონიათ, რომ ეს არის მხოლოდ მარკეტინგი და პროპაგანდა. ვერ ხვდებიან რამდენად დიდია ტურიზმის წილი და როლი ეკონომიკის განვითარებაში. მთავრობა, რომელიც ამას ხვდება თუნდაც სავიზო შეზღუდვებს არ დააწესებს. ამან საქართველოზე უარყოფითი გავლენა მოახდინა. ბევრი ფაქტორია, რაც დღეს ხდება, ხელს არ უწყობს ტურიზმის განვითარებას და ვიზიტორების მოზიდვას. ჩემი ვარაუდით, ვერ მოიცალეს ჯერ ამ სფეროს მისახედად, რადგანაც გადართულები არიან ეკონომიკურ-ფინანსურ ინსტიტუტებზე და ამ ფონზე ტურიზმის სფეროს მნიშვნელობა მათთვის გაუფასურებულია.
- ასეთ შემთხვევაში იძლევა თუ არა ტურიზმის მსოფლიო ორგანიზაცია რეკომენდაციებს და რა დირექტივები შეიძლება მიიღოს საქართველომ ამ შემთხვევაში?
- როდესაც ტურიზმის ეროვნული ადმინისტრაციის ხელმძღვანელი ვიყავი საკმაოდ მჭიდრო კავშირი და ურთიერთობა გვქონდა ტურიზმის მსოფლიო ორგანიზაციასთან. ახლა კომუნიკაცია კიდევ უფრო გაადვბილებულია, რადგან ჩემი ყოფილი მოადგილე ბექა ჯაყელი, დღეს ტურიზმის მსოფლიო ორგანიზაციის ოფისშია - მადრიდში და კომუნიკაცია, პირიქით, უფრო გაადვილებულია. მათი მხრიდან ნებისმიერი რეკომენდაცია ჩვენთვის ძალიან დიდი დახმარება იყო და დღესაც დარწმუნებული ვარ ეს კომუნიკაცია, რომ აღდგეს ბევრ, კარგ რჩევას მივიღებდით. ვფიქრობ, კარგი იქნებოდა საქართველოს პრემიერ-მინისტრი შეხვედროდა ტურიზმის მსოფლიო ორგანიზაციის ხელმძღვანელს, რადგანაც დარწმუნებული ვარ, რომ ის სხვანაირად აუხსნიდა მთავრობას ყველაფერს.
შეგახსენებთ, რომ თურქეთი ტურისტებით სავსე ყოველ თვითმფრინავზე, რომელიც საქართველოდან და სხვა რამდენიმე ქვეყნიდან თურქეთში ჩაფრინდება, ტურისტული სააგენტოზე დაფინანსებას, 6000 დოლარს გამოყოფს.
როგორც უცხოური მედია წერს, მთავრობის გადაწყვეტილებაზე უკვე ღიად ისაუბრა თურქეთის კულტურისა და ტურიზმის მინისტრმა ომან ჩელიკმა. მისი ინფორმაციით, ტურისტული სააგენტოები, რომლებიც მუშაობენ საქართველოზე, აზერბაიჯანზე, ირანზე, რუსეთზე, ბელორუსზე, სომხეთზე, მოლდოვაზე, ყირგიზეთზე, უკრაინაზე, უზბეკეთზე და ტაჯიკეთზე, სახელმწიფოსგან ფინანსურ დახმარებას მიიღებენ.
"ფინანსური დახმარება - "მხარდაჭერა საწვავით" მიმართულია ტურისტულ სექტორში შესაძლო ეკონომიკური კრიზისის მინიმალიზირებისკენ", - განაცხადა ჩელიკმა. მინისტრმა ასევე განმარტა, რომ სახელმწიფო მზადაა ტუროპერატორებს საბიუჯეტო სესხი გამოუყოს.
"ჯი-ეიჩ-ენი", ესაუბრა მაია არაბიძე
-
