"აშკარად ჩანს და მეც ვადასტურებ, რომ ეს დოკუმენტი არის ანექსიისკენ გადადგმული კიდევ ერთი ნაბიჯი, რომელიც აფხაზური საზოგადოების წინააღმდეგაა მიმართული",_ განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა რუსეთსა და აფხაზეთს შორის გასაფორმებელი შეთანხმების პროექტის "მოკავშირეობისა და ინტეგრაციის შესახებ" კომენტირებისას.
"აშკარად ჩანს, რომ რუსეთი არც ფიქრობდა აფხაზეთის რეალურ აღიარებაზე. ეს კიდევ ერთი დასტურია რუსეთის ეფემერული და ცინიკური ნაბიჯების რეალობისა, რომ ის აფხაზეთის ანექსიაზე ფიქრობს",- განაცხადა მინისტრმა და აღნიშნა რომ ჯერჯერობით ეს დოკუმენტი არის მხოლოდ პროექტი, რომელიც მისი საბოლოო ვარიანტისგან ჯერ ძალიან შორსაა.
"ამ დოკუმენტის ტექსტმა აფხაზური საზოგადოების საკმაოდ სერიოზული შეშფოთება გამოიწვია და როგორც ჩანს, საბოლოო დოკუმენტი თუ იქნება, ის იქნება პრინციპულად განსხვავებული",_ აცხადებს ზაქარეიშვილი და აღნიშნავს, რომ პირველ რიგში ეს დოკუმენტი მიმართულია აფხაზეთისა და აფხაზური საზოგადოებისა და თვითმყოფადობის წინააღმდეგ.
"რასაც წლების განმავლობაში ვეუბნებოდით აფხაზურ საზოგადოებას, რომ რუსეთი არ არის მეგობარი სახელმწიფო და რუსეთი არ ფიქრობს, არ ზრუნავს აფხაზეთზე - ამ დოკუმენტით უკვე ჩანს",_ აცხადებს ზაქარეიშვილი და აღნიშნავს, რომ დოკუმენტის ერთადერთი და ისიც პირობითი პლიუსი არის ის, რომ ეს დოკუმენტი გამოქვეყნდა.
მინისტრი აცხადებს, რომ წინა დოკუმენტს, რომელსაც გადაჰყვა კიდეც ანქვაბი სავარაუდოდ სწორედ "ასოცირების ხელშეკრულება" ერქვა.
"წინა დოკუმენტი, რომელსაც გადაჰყვა, როგორც ჩანს ბატონი ანქვაბი, ვერავინ ვერ ნახა თვალით, თუმცა როგორც ჩანს იმ დოკუმენტს ერქვა კიდეც ასოცირების ხელშეკრულება. აფხაზეთის დღევანდელმა დე-ფაქტო მთავრობამ კი ჩათვალა, რომ ჯობდა ამ დოკუმენტის ტექსტი გამოქვეყნებინა - ეს თავისთავად ძალიან საინტერესო მოვლენაა. მათ ეს დოკუმენტი აფხაზური საზოგადოების განხილვის საგნად აქციეს და უკვე მოხდა სერიოზული მსჯელობა. ე.წ მთავრობასთან ახალგაზრდები მივიდნენ და საკმაოდ მძაფრი საუბარიც კი იყო ე.წ. ვიცე-პრეზიდენტთან და ე.წ. ადმინისტრაციის ხელმძღვანელთან. ე.წ. პარლამენტის სპიკერმა გააკეთა საკმაოდ მკაფიო განცხადებები",_ განაცხადა მინისტრმა და აღნიშნა, რომ "აშკაად ჩანს, რომ ეს მოულოდნბელად გამოქვეყნებული დოკუმენტი ბევრ ვნებათაღელვას გამოიწვევს აფხაზეთში".
