საპარლამენტო ფრაქცია „ქრისტიან-დემოკრატების" თავმჯდომარე გიორგი ახვლედიანი პარტიის აჭარის რეგიონული ორგანიზაცის წარმომადგენლებთან ერთად უამინდობის მიუხედავად, ბათუმში ილია ჭავჭავაძის ძეგლთან შეკრებილ აფხაზეთიდან დევნილ მოსახლეობას შეხვდა.
დევნილები სახელმწიფოსგან იმ ბინებში შესახლებას მოითხოვენ, რომელიც საგანგებოდ დევნილებისთვის ბენზეს დასახლებაში აშენდა. 608 ოჯახზე გათვლილი საცხოვრებელი კომპლექსი 12 იანვარს საქართველოს პრეზიდენტმა გახსნა. აღნიშნული ბინებით ძირითადად წყალტუბოსა და ფოთში მცხოვრები დევნილები დააკმაყოფილეს, ადგილობრივებიდან კი საცხოვრებელი ფართით მხოლოდ ორი ოჯახი უზრუნველყვეს, ათეულობით კი კვლავ ბინით დაკმაყოფილების მოლოდინშია. იძულებით გადაადგილებული პირები ასევე იმ სიების გამჭვირვალობას მოითხოვენ, რომლის საფუძველზეც ეტაპობრივად მათი საცხოვრებელი ფართით უზრუნველყოფა უნდა მოხდეს.
„დაუშვებელია სახელმწიფო დევნილებისთვის აშენებდეს საცხოვრებელ ბინებს და მათი ამ ბინებში შესახლების პროცესი არ მიმდინარეობდეს გამჭვირვალედ. ამ ადამიანებს სახელმწიფო ჯერ კიდევ 2006 წელს მოექცა ძალიან ცუდად, როცა სასტუმროებიდან იძულების წესით გამოასახლა. და ახლა ნაცვლად იმისა, რომ მათი საცხოვრებელი პირობების გაუმჯობესებაზე ზრუნავდეს, მათ თვალწინ აშენებს ახალ საცხოვრებელ კორპუსებს და მათ არ აძლევს იქ ცხოვრების საშუალებას." - განაცხადა შეხვედრისას გიორგი ახვლედიანმა.
მისივე თქმით „ქრისტიან-დემოკრატები" ამ საკითხზე აუცილებლად ისაუბრებენ პრეზიდენტთან საპარლამენტო დებატებისას.