ჩრდილოეთ ოსეთის მაცხოვრებლების საქართველოში შემოსვლაზე შეზღუდვა არ არსებობს. ამის შესახებ დღეს გამართულ ტრადიციულ პრესკონფერენციაზე საქართველოს საგარეო საქმეთა მინისტრის მოადგილემ დავით ჯალაღანიამ განაცხადა. როგორც ჯალაღანიამ განაცხადა, აღნიშნულ საკითხთან დაკავშირებით რუსი კოლეგის, ალექსანდრ ლუკაშევიჩის განცხადება არის ცინიკური და უტიფარი.
"ასეთ შეზღუდვას არ აქვს ადგილი. აბსოლუტურად გამორიცხულია ეს და ეს არის სისულელე. გვაკვირვებს რუსეთის საგარეო უწყების ასეთი რეაქცია. კეთილმეზობლური, ადამიანის უფლებებიდან და იმ ნათესაობიდან გამომდინარე, რომელიც სუფევს მოსაზღვრე რეგიონებში მაცხოვრებლებს შორის, საქართველომ მიიღო შეღავათიანი მიმოსვლითი რეჟიმი ჩვენ მეზობელ რუსეთის ტერიტორიებთან. მაშინ სხვა რიტორიკა იყო და მაშინ თითქოს საქართველო რუსეთის ფედერალურ წყობას უქმნიდა საფრთხეს. ამჟამად რუსეთის მხარეს დაინტერესდა უკვე მოქალაქეთა იმ უფლებების დაცვით, რომლითაც ისინი განსაკუთრებული რეჟიმით უნდა მოხვდნენ საქართველოში. არავითარი აკრძალვა არ არის და ეს ის რეჟიმია, რომელიც არსებობს და იცით რომ ეს არის ფრიად შეღავათიანი რუსეთის მოქალაქეთათვის, რომელთაც უნდათ შემოსვლა ვიზით. სავიზო რეჟიმის დაფიქსირებაც მოგეხსენებათ, რომ რუსეთის ინიციატივით მოხდა", - განაცხადა ჯალაღანიამ.
ის რუსეთს მოუწოდებს, რომ ასეთივე გულისხმიერება გამოიჩინოს საქართველოს მოქალაქეების მიმართ.
"ხშირ შემთხვევაში რუსეთის წარმოშობის ადამიანებს, რომლებსაც უნდათ რუსეთის ტერიტორიაზე შესვლა, ძალზედ გართულებული აქვთ ვიზის მოპოვების მექანიზმი, რომლითაც ისინი შეძლებდნენ რუსეთის ტერიტორიაზე მოხვედრას. არაზუსტი განცხადებების გაკეთებას ჯობია ამ საკითხზე გაამახვილონ ყურადღება", - განაცხადა ჯალაღანიამ.
შეგახსენებთ, რომ ალექსანდრ ლუკაშევიჩის მტკიცებით, ჩრდილოეთ ოსეთის მოსახლეობას საქართველოში შემოსვლაზე პრობლემები აქვთ.
