საპარლამენტო უმრავლესობის მტკიცებით, "თავისუფალ დემოკრატებს", "ხალხის პარტიას", "რესპუბლიკელებს" და "კონსერვატორებს", ივანიშვილისგან მიღებული თანხები არ ჩამოერთმევათ, თუ შემოწირულობის მიღების მომენტში კანონი არ დაურღვევიათ. როგორც დღეს პრესკონფერტენციაზე, იურიდულ საკითხთა კომიტეტის თავჯდომარემ და მოქალაქეთა პოლიტიკური გაერთიანებების შესახებ კანონში განხორციელებული ცვლილებების ერთ-ერთმა ინიციატორმა პავლე კუბლაშვილმა აღნიშნა, იმ შემთხვევაში, თუ კონკრეტულ პოლიტიკურ პარტიას შემოწირულობა მიღებული აქვს ცვლილებების მიღებამდე, მასზე უკუქმედების ძალა არ გავრცელდება. თუმცა კუბლაშვილი აცხადებს, რომ პოლიტიკურ სუბიექტებს შესაძლებელია შემოწირულობასთან დაკავშირებით კანონის სხვა ნორმები ჰქონდეთ დარღვეული.
"ინტერესი გამოიწვია ოთხმა სუბიექტმა, როგორიც არის ალასანიას პარტია, "კონსერვატორები", "რესპუბლიკელები" და დავითაშვილის პარტია. მინდა ცალსახად განვაცხადო, რომ მათ მიერ შემოწირულობის მიღების მომენტში თუ კანონი არ იყო დარღვეული, მაშინ მათ ამ ფულს ვერ ჩამოართმევენ და არ დაჯარიმდებიან", - აღნიშნა უმრავლესობის წევრმა.
მისი თქმით, თუ კონკრეტულ აპრტიებს რაიმე სახის დარღვევები აქვთ ფინანსურ აქტივობებთან დაკავშირებით, აუცილებელია 3 კალენდარული დღის განმავლობაში კონტროლის პალატას მიმართონ და ხარვეზები გამოასწორონ.
