ისრაელის თავდაცვის ძალების (IDF) განცხადებით, ღაზის სექტორში ოპერაციის დროს მოკლეს აშშ-ისა და ევროკავშირის მიერ ტერორისტულ დაჯგუფებად აღიარებული "ჰამასის" ერთ-ერთი დამფუძნებელი ჰაკამ ალ ისა.
მათივე ცნობით, ალ ისა "ჰამასის" სამხედრო ფრთის შტაბის უფროსის თანამდებობას იკავებდა და მონაწილეობდა 2023 წლის 7 ოქტომბრის ისრაელზე თავდასხმის ორგანიზებაში.
ისრაელის არმია აცხადებს, რომ ალ-ისა ასევე ხელმძღვანელობდა თავდასხმებს ისრაელის მშვიდობიან მოქალაქეებსა და ჯარისკაცებზე ღაზას სექტორში.
ისრაელის თავდაცვის ძალებმა პირობა დადო, რომ "გააგრძელებს გადამწყვეტ მოქმედებებს 7 ოქტომბრის თავდასხმაში მონაწილე ყველა პირის გასანადგურებლად".
2023 წლის 7 ოქტომბერს "ჰამასის" მიერ ისრაელზე განხორციელებული თავდასხმის დროს ათასზე მეტი ადამიანი დაიღუპა. 250-ზე მეტი ადამიანი ტყვედ აიყვანეს და ღაზაში გადაიყვანეს. ბოლო ინფორმაციით, ღაზის სექტორში ჯიჰადისტების მიერ ჯერ კიდევ 50 ადამიანია დაკავებული, რომელთაგან დაახლოებით 20 ცოცხალია.
2023 წლის ოქტომბრიდან ისრაელის თავდაცვის ძალები ღაზაში სახმელეთო ოპერაციას ატარებენ. გამოცხადებული მიზნებია მძევლების გათავისუფლება და ჰამასის დაჯგუფების განადგურება.
