საფრანგეთში, 29 ივნისიდან ძალაში შევიდა პლაჟებზე, პარკებსა და სხვა საზოგადოებრივ ადგილებში მოწევის აკრძალვის ახალი წესები.
ამ წესების მიზანია ბავშვების დაცვა პასიური მოწევის საფრთხისგან, რომელიც, ოფიციალური მონაცემებით, ქვეყანაში წელიწადში 3000-დან 5000-მდე ადამიანს კლავს.
ახალი წესები, რომელიც შაბათს, მთავრობის ოფიციალურ მაცნეში გამოქვეყნდა, მოწევას კრძალავს ავტობუსის გაჩერებებზე და 10 მეტრის რადიუსში ბიბლიოთეკებიდან, საცურაო აუზებიდან, სკოლებიდან და ყველა იმ ადგილიდან, რომელსაც ბავშვები ხშირად სტუმრობენ.
აკრძალვა არ ვრცელდება ბარებისა და რესტორნების ტერასებზე. ასეთი აკრძალვა მალე ძალაში შევა ესპანეთში.
ახალ წესებში ნახსენები არ არის ელექტროსიგარეტები.
აკრძალვის დამრღვევს შეიძლება დაეკისროს 135 ევროდან 700 ევრომდე ჯარიმა.
"თამბაქო უნდა გაქრეს იმ ადგილებიდან, სადაც ბავშვები არიან. პარკი, პლაჟი, სკოლა - ეს არის ადგილები, სადაც შეგიძლიათ ითამაშოთ, ისწავლოთ და ისუნთქოთ. ეს ადგილები არ არის მოწევისთვის", - განაცხადა ჯანდაცვისა და საოჯახო საკითხთა მინისტრმა.
მისი თქმით, ახალი წესები კიდევ ერთი ნაბიჯია "თამბაქოსგან თავისუფალი თაობისკენ".
