იურიდიულ საქმეთა კომიტეტის სხდომაზე სისხლის სამართლის კოდექსში შესატანი ცვლილებების განხილვისას აღინიშნა, რომ მას შემდეგ, რაც პარლამენტი კანონში ცვლილებებს დაამტკიცებს, გადასახადების დამალვის გამო დაკავებული პირების საქმეების გადაკვალიფიცირება მოხდება.
როგორც იურიდიულ საკითხთა კომიტეტის თავმჯდომარის პირველმა მოადგილემ კახაბერ ანჯაფარიძემ განმარტა, პირები რომლებიც განსაკუთრებით დიდი ოდენობის თანხების დამალვისთვის იყვნენ დაკავებულები კანონში ცვლილებების შემდეგ მათთვის წაყენებული მუხლი შეიცვლება.
"დღემდე განსაკუთრებით დიდ ოდენობად ითვლებოდა 75 ათას ლარს ზემოთ გადასახადების დამალვა, დღეს კი ეს ნიშნული 100 ათას ლარს ზემოთ იზრდება. შესაბამისად პირები ვინც ამ მუხლით იყვნენ დაკავებულები აღარ მიუდგებათ განსაკუთრებით დიდი ოდენობა და მათი საქმეების განხილვა მოხდება როგორც დიდი ოდენობსი თანხების დამალვა, რომელიც ახალი რეგულაციით 50 ათასიდან ზემოთ ითვალისწინებს" - განმარტა ანჯაფარიძემ.
მისივე თქმით, იმ პირებს ვინც აღნიშნული დანაშაულების გამო სასჯელს უკვე იხდიდნენ და გადაკვალიფიცირების შემდეგ აღმოჩნდება, რომ მათ დიდი ოდენობის თანხების დამალვისთვის სასჯელი უკვე მოხდილი აქვთ ისინი სრულად გათავისუფლებდებიან საპატიმროდან, ხოლო დანარჩენებს სასჯელი შეუმსუბუქდებათ.
