ბელგია უკრაინისთვის 2026 წლის ბოლომდე F-16 ტიპის 10 გამანადგურებლის გადაცემას გეგმავს, საფრანგეთი კი უკრაინას ორ Mirage 2000-5F ტიპის გამანადგურებელს მიაწვდის. ამის შესახებ უკრაინის თავდაცვის სამინისტრო ბრიუსელში, 17 ნოემბერს გამართული უკრაინის თავდაცვის საკონტაქტო ჯგუფის (რამშტაინის ფორმატის) 37-ე შეხვედრის შედეგებზე დაყრდნობით იუწყება. ინფორმაციას უკრაინული მედია ავრცელებს.
უკრაინის თავდაცვის სამინისტროს ინფორმაციით, ბელგია, გამანადგურებლების გარდა, უკრაინას საჰაერო თავდაცვის რაკეტებსა და საბრძოლო მასალასაც გადასცემს, მათ შორის F-16 ტიპის თვითმფრინავებისთვის განკუთვნილ საბრძოლო მასალას.
ბელგიის საერთო მხარდაჭერა უკრაინის მიმართ მიმდინარე წელს 1.1 მილიარდ ევროს შეადგენს, საიდანაც 100 მილიონი ევრო PURL-ის ინიციატივის ფარგლებში გამოიყოფა.
საფრანგეთი უკრაინას ასევე მიაწვდის Thales-ის წარმოების GF300 ტიპის ანტიბალისტიკურ სარადარო სადგურს, AASM Hammer 250 ტიპის საავიაციო ბომბებსა და Mirage-ის გამანადგურებლებისთვის განკუთვნილ საბრძოლო მასალას.
გარდა ამისა, რამშტაინის შეხვედრაზე სხვა პარტნიორებმაც განაცხადეს უკრაინის საჰაერო თავდაცვის გაძლიერებისა და უკრაინული წარმოების დრონების შესყიდვის მხარდაჭერის შესახებ.
უკრაინის თავდაცვის მინისტრმა ევგენი ხმარამ განაცხადა, რომ ამ ზამთარს უკრაინის მთავარი პრიორიტეტი ცის დაცვაა.