აშშ-ის კალიფორნიის შტატის გუბერნატორი გევინ ნიუსომი უკრაინას ეწვია და ქვეყნისთვის სამედიცინო და ჰუმანიტარული დახმარების გადაცემის შესახებ განაცხადა.
კალიფორნია უკრაინას გადასცემს ელექტროენერგიის გენერატორებს, 50-საწოლიან საველე სამედიცინო პუნქტს, 1 300-ზე მეტ საავადმყოფოს საწოლს და სხვა აუცილებელ სამედიცინო აღჭურვილობას. დახმარება უკრაინელ ექიმებს ომში დაჭრილების მკურნალობაში დაეხმარება.
კალიფორნიის გუბერნატორის ადმინისტრაციის ცნობით, დახმარება შტატის საგანგებო სიტუაციების მართვის სამსახურის მეშვეობით გაიგზავნება. საუბარია ჭარბი სამედიცინო აღჭურვილობისა და მარაგების გადაცემაზე. ეს დახმარება ავსებს იმ მხარდაჭერას, რომელიც კალიფორნიამ უკრაინას ომის პირველ თვეებში გაუწია, მათ შორის ხუთი სამედიცინო პუნქტისა და დამცავი აღჭურვილობის გაგზავნას.
უკრაინაში ვიზიტისას ნიუსომი ლვოვის ოლქის გუბერნატორს, მაქსიმ კოზიცკის და რეგიონის სხვა წარმომადგენლებს შეხვდა. მათ პატივი მიაგეს დაღუპულ უკრაინელ სამხედროებს, მოინახულეს ომის შედეგად დაჭრილთა სარეაბილიტაციო ცენტრი და გაეცნენ თავდაცვის ტექნოლოგიების კომპანიებისა და სტარტაპების საქმიანობას, რომლებიც უკრაინას რუსეთის წინააღმდეგ ბრძოლაში ეხმარებიან.
„უკრაინელ ხალხს ეს ომი არ აურჩევია. მათ აირჩიეს თავისუფლების, დემოკრატიისა და საკუთარი მომავლის დამოუკიდებლად განსაზღვრის უფლების დაცვა. მათმა სიმამაცემ თავისუფალი სამყარო შთააგონა. ამ სიმამაცეს ხანგრძლივი მხარდაჭერა უნდა მოჰყვეს. თავისუფლებისთვის მებრძოლ ხალხს არ უნდა ჰქონდეს განცდა, რომ მარტო დარჩა. კალიფორნია უკრაინის გვერდით დგას“, – განაცხადა ნიუსომმა.
.უკრაინაში ვიზიტამდე ნიუსომი თურქეთში გაერო-ს სამიტს დაესწრო, შემდეგ კი პოლონეთს ეწვია. ვარშავაში უკრაინელ და ამერიკელ ენერგეტიკის სფეროს წარმომადგენლებთან შეხვედრისას მან განაცხადა, რომ ვაშინგტონში პოლიტიკური ცვლილებების მიუხედავად, კალიფორნია უკრაინის სტაბილურ პარტნიორად დარჩება.