რუსეთის არმიამ ხერსონის ოლქის ოკუპირებულ ქალაქ ოლეშკიში ცეცხლის შეწყვეტის რეჟიმი დნიპროს მარცხენა სანაპიროზე პირადი შემადგენლობისა და სამხედრო ტექნიკის მასშტაბური როტაციისთვის გამოიყენა. ქალაქსა და მის მიმდებარე დასახლებებში საოკუპაციო ძალებმა დამატებითი სამხედრო დანაყოფები შეიყვანეს.
ამის შესახებ უკრაინის პრეზიდენტი ვოლოდიმირ ზელენსკი რეგიონული ადმინისტრაციების ხელმძღვანელებთან შეხვედრის შემდეგ. სოციალურ ქსელში წერს.
„სამწუხაროდ, ოლეშკიში ჰუმანიტარული ოპერაციის საფარქვეშ რუსეთის არმიამ დნიპროს მარცხენა სანაპიროზე პირადი შემადგენლობისა და ტექნიკის მნიშვნელოვანი როტაცია განახორციელა. ოლეშკისა და მიმდებარე თემის ტერიტორიაზე საოკუპაციო ძალებმა დამატებითი ძალები შეიყვანეს“, - განაცხადა ზელენსკიმ.
ზელენსკის განცხადებით, უკრაინის შეიარაღებული ძალების სარდლობამ უნდა წარადგინოს წინადადებები ხერსონის მცხოვრებლების რუსული თავდასხმებისგან დამატებითი დაცვის მიზნით.
ზელენსკიმ ასევე განაცხადა, რომ რუსეთის ძალებმა მნიშვნელოვნად გააძლიერეს კრამატორსკისა და მიმდებარე დასახლებული პუნქტების დაბომბვა. საპასუხო ზომების განსაზღვრა უკრაინის უმაღლესი მთავარსარდლის შტაბის სხდომაზე იგეგმება.
შეგახსენებთ: მანამდე ზელენსკიმ განაცხადა, რომ ხერსონის ოლქის ოკუპირებულ ქალაქ ოლეშკიში ცეცხლის შეწყვეტის გამოცდილება ადასტურებს, რომ ზავის სწრაფად დამყარება ხანგრძლივი მოსამზადებელი პროცესის, შეიარაღების გაყვანის ან ბუფერული ზონების შექმნის გარეშეც შესაძლებელია.
