კრაკოვის ცენტრში მომხდარ სროლამდე 24 წლის თავდამსხმელმა, სავარაუდოდ, საკუთარი მშობლები და 21 წლის და მოკლა. მათი ცხედრები პოლიციამ თავდამსხმელის სახლში, ქალაქ ოსტროვიეც-შვიენტოკშისკიში აღმოაჩინა. ინფორმაციას ABC News ავრცელებს.
პოლონეთის პოლიციის ინფორმაციით, გარდაცვლილები თავდამსხმელის ოჯახის წევრები არიან - 53 წლის მამა, 52 წლის დედა და 21 წლის და. მათ სხეულებზე ცეცხლსასროლი იარაღით მიყენებული ჭრილობები აღმოაჩინეს. მომხდართან დაკავშირებით გამოძიება მიმდინარეობს.
თავდამსხმელი პოლონეთის მოქალაქეა. მისი ვინაობა პოლიციას ოფიციალურად ჯერ არ გაუსაჯაროვებია. ის პოლიციასთან სროლის შედეგად დაიჭრა და ამჟამად საავადმყოფოში კრიტიკულ მდგომარეობაში იმყოფება.
ცნობისთვის, 7 ნოემბერს კრაკოვის ცენტრალურ მოედანზე თავდამსხმელმა ცეცხლი გახსნა, რის შედეგადაც ექვსი ადამიანი დაიღუპა, 15 კი დაიჭრა მათ შორის 2 პოლიციელი, საავადმყოფოში რჩება და მათი მდგომარეობა სტაბილურია. პოლონეთის პროკურატურამ მომხდარზე ტერორისტული აქტის მუხლით დაიწყო გამოძიება.
