24 აგვისტოს უკრაინის დამოუკიდებლობის დღესთან დაკავშირებით, საქართველოში უკრაინის საქმეთა დროებითი რწმუნებული, დმიტრო ბერეჟნი ვრცელ განცხადებას აქვეყნებს და ქართველ ხალხს თანადგომისთვის მადლობას უხდის.
"სრულმასშტაბიანი შემოჭრის ყველაზე მძიმე პირველ დღეებში, როდესაც უკრაინის ბედი თითოეულ ადამიანზე იყო დამოკიდებული, ვინც ამ ქვეყნის ბედი საკუთარ საქმედ მიაჩნდა, უკრაინელ სამხედროებს გვერდით მრავალი მეგობარი ქვეყნის მოხალისეები და გმირები დაუდგნენ. მათ შორის განსაკუთრებული ადგილი საქართველოს შვილებს უკავიათ.
დღეს მრავალი ქართველი მებრძოლი - საქართველოს სხვადასხვა ეროვნების მოქალაქეები და ეთნიკური ქართველები, რომლებიც სხვა სახელმწიფოების მოქალაქეები არიან, უკრაინის შეიარაღებული ძალებისა და უკრაინის თავდაცვის ძალების სხვა ფორმირებების შემადგენლობაში იბრძვის. იარაღით ხელში ისინი უკრაინის თავისუფლებას, დამოუკიდებლობასა და ტერიტორიულ მთლიანობას იცავენ და შესანიშნავად ესმით, რომ ეს საერთო ბრძოლაა.
რუსეთის აგრესიისა და საკუთარი მიწების ოკუპაციის გამოცდილი ქართველ ხალხს, სხვაზე უკეთ, ესმის უკრაინის ტკივილი და აცნობიერებს, რომ დღეს ხარკოვის, ზაპოროჟიესა თუ ხერსონის რეგიონებში მხოლოდ უკრაინის მომავალი არ წყდება - იქ რუსეთის იმპერიალიზმის წინააღმდეგ ბრძოლის ერთ-ერთი მთავარი ზღვარი გადის. ამ ბრძოლის შედეგზე დამოკიდებულია რუსეთის მიერ ოკუპირებული საქართველოს რეგიონების - აფხაზეთისა და ცხინვალის რეგიონის მომავალიც.
ქართველი გმირების სიმამაცე, უშიშრობა და თავგანწირვა უკრაინის ფრონტზე სოლიდარობის უმაღლეს გამოხატულებად და ქართველი ხალხის მიერ ჩვენს საერთო გამარჯვებაში შეტანილ უმნიშვნელოვანეს წვლილად იქცა. ქედს ვიხრით იმ უკრაინელი და ქართველი სამხედროების ხსოვნის წინაშე, რომლებმაც სიცოცხლე უკრაინისა და საქართველოს თავისუფლებისთვის გაწირეს. მათი გმირობა სამუდამოდ ჩაიწერება ჩვენი საბრძოლო ძმობის ისტორიაში და მომავალი თაობებისთვის გზამკვლევი გახდება", - წერს დიპლომატი.
მისი ინფორმაციით, ომის დაწყებიდან დღემდე საქართველოს ტერიტორია 500 ათასზე მეტმა უკრაინელმა გაიარა, ამ დრომდე კი ქვეყანაში 27 000-ზე მეტი უკრაინელი.
"ჩვენ გულწრფელ მადლობას ვუხდით საქართველოს მხარდაჭერის თითოეული გამოხატვისთვის, თითოეული ქართველი ჯარისკაცისთვის, რომელიც ჩვენ გვერდით დგას ფრონტის წინა ხაზზე, თითოეული უკრაინელი ბავშვისთვის გაწეული თავშესაფრისთვის, უკრაინის მხარდასაჭერად გაღებული თითოეული ლარისა და გაგზავნილი თითოეული გენერატორისთვის.
დარწმუნებული ვართ, რომ უკრაინელი და ქართველი ხალხების ერთობლივი ბრძოლა თავისუფლების, დამოუკიდებლობის, ტერიტორიული მთლიანობისა და ევროპული მომავლისთვის აუცილებლად დასრულდება სამართლიანობის აღდგენით, ჩვენი სუვერენული ტერიტორიების სრული დეოკუპაციით და ხანგრძლივი და სამართლიანი მშვიდობის დამყარებით.
დიდება უკრაინას!
გაუმარჯოს საქართველოს!", - წერს დმიტრო ბერეჟნი.
