ნატო-ს გენერალურმა მდივანმა მარკ რუტემ ალიანსის წევრ ქვეყნებს მოუწოდა, უკრაინის დასახმარებლად საკუთარი მშპ-ის 0,25% გამოყონ. ამის შესახებ გამოცემა Politico წერს.
გამოცემის ინფორმაციით, ამ ინიციატივამ, რომელმაც შესაძლოა უკრაინისთვის დამატებითი დახმარების სახით ათობით მილიარდი დოლარი გაათავისუფლოს, უკვე გამოიწვია ნატო-ს რამდენიმე მსხვილი წევრი ქვეყნის წინააღმდეგობა.
ალიანსის გენერალურმა მდივანმა ეს საკითხი გასული თვის ბოლოს ნატო-ს ელჩების დახურულ შეხვედრაზე დააყენა. განხილვა ივლისში თურქეთში დაგეგმილი ნატო-ს სამიტისთვის მზადების ფარგლებში გაიმართა.
„რუტეს და ბევრ ჩვენგანს სურს, დარწმუნდეს, რომ უკრაინის მხარდაჭერა თანმიმდევრული და პროგნოზირებადი იქნება“, - განაცხადა ნატო-ს ერთ-ერთმა დიპლომატმა.
მნიშვნელოვანია, რომ თუ მოკავშირეები ამ იდეას მხარს დაუჭერენ, უკრაინისთვის ყოველწლიური დახმარების მოცულობა ფაქტობრივად გასამმაგდება და ნატო-ს შეფასებით 143 მილიარდ დოლარს მიაღწევს, რაც ალიანსის წევრი ქვეყნების ერთობლივ მშპ-ს ეფუძნება.
რუტეს ინიციატივა ნაწილობრივ იმ უკმაყოფილების პასუხიც გახდა, რომელიც ზოგიერთ დედაქალაქში არსებობს. მათი აზრით, უკრაინის დახმარების ტვირთს ზოგი ქვეყანა სხვებზე ბევრად მეტად იღებს საკუთარ თავზე.
Ukraine Support Tracker-ის მონაცემებით, ჩრდილოეთისა და ბალტიის ქვეყნები, ასევე ნიდერლანდები და პოლონეთი, უკრაინის სამხედრო დახმარებისთვის საკუთარი მშპ-ის უფრო დიდ წილს გამოყოფენ, ვიდრე ნატოს ბევრი სხვა წევრი ქვეყანა.
როგორც გამოცემა აღნიშნავს, მარკ რუტე ცდილობს, უკრაინის მხარდაჭერა უზრუნველყოს და ამავდროულად ალიანსის შიგნით არსებული უთანხმოებები მინიმუმამდე დაიყვანოს. უკრაინის დახმარების საკითხი ქაოსურ მდგომარეობაში აღმოჩნდა მას შემდეგ, რაც დონალდ ტრამპმა თითქმის მთელი ახალი სამხედრო დახმარება შეაჩერა, რის შედეგადაც კიევის მხარდაჭერის ძირითადი ტვირთი ევროპულ ქვეყნებსა და სხვა მოკავშირეებზე გადავიდა.
„ჩვენ მივდივართ ანკარაში დაგეგმილ სამიტზე, რომელიც, რა თქმა უნდა, დიდწილად უკრაინას დაეთმობა - იმას, თუ როგორ შევუნარჩუნოთ მას მაქსიმალურად ძლიერი პოზიცია“, - განაცხადა რუტემ.
