სამწუხარო რეალობის წინაშე ვდგავართ ახლა ყველანი, სადაც სიმართლე დასჯადია. - ამის შესახებ მიმდინარე აქციების ფარგლებში აფეთქების მომზადების ბრალდებით დაკავებულმა 26 წლის დავით ხომერიკმა სასამართლო სხდომაზე განაცხადა.
"პირველ რიგში, თედოს ამბავი ძალიან გამიხარდა, თედოს ნაჩუქარი სამაჯურია ეს, ხელზე რომ მიკეთია, სხვათა შორის.
სამწუხარო რეალობის წინაშე ვდგავართ ახლა ყველანი, სადაც სიმართლე დასჯადია. ჩვენ ამ ბრძოლაში რახანია ერთად ვართ საერთო ღირებულებების გამო - ვიცხოვროთ თავისუფალ ქვეყანაში, რომელსაც ქართველი ხალხი იმსახურებს. გზა ამ
მიზნისკენ ეკლებითაა სავსე, მას თავისუფალ სამშობლომდე მივყავართ. არ მესმის, რატომ უნდა ისჯებოდნენ ადამიანები სიმართლისთვის ბრძოლის გამო?!"- თქვა მან.
დავით ხომერიკის თქმით, "გავრილოვის ღამემ" მისი პროტესტის შეგრძნებებსა და განცდებში მთავარი როლი ითამაშა. 26 წლის ხელოვანი მოსამართლეს უხსნიდა, რომ ის ხშირ შემთხვევაში პროტესტს სწორედ მუსიკით გამოხატავდა:
მუსიკა და ხელოვნება აღმოჩნდა ჩემთვის ის მთავარი რამ, რითიც გამოვხატავდი ჩემს პროტესტს. მჯერა, მუსიკა მშვიდობის მთავარი ინსტრუმენტია. პროტესტს სულ მშვიდობიანად გამოვხატავდი, მუსიკით ხშირად. ყველაფერი გავრილოვის ღამეს დაიწყო - სპეცრაზმელები სასტიკად გაუსწორდნენ ხალხს, დაზიანდნენ ჩემი მეგობრები, ამან წარუშლელი კვალი დატოვა მათ ჯანმრთელობაზე - აქ იკვეთება რუსეთის როლი, ის დღემდე გვებრძვის სხვადასხვა ფორმით. გავრილოვის ღამემ ჩემი პროტესტის შეგრძნებებსა და განცდებში მთავარი როლი ითამაშა. არაერთი დარბევის მომსწრე გავხდი - მთავრობა დაუპირისპირდა მშვიდობიან მოქალაქეებს ძალადობით"- დასძინა ხომერიკმა.
რაც შეეხება ბრალდებას, რომლის საფუძველზე ახალგაზრდა თითქმის 9 თვეა, ციხეშია, ბრალდებული აღნიშნავს, რომ საქმე შეკერილია.
ჩემი თითქმის 9-თვიან პატიმრობასა და პროკურატურის შეკერილ საქმეზე გეტყვით, რომ ამ საქმეში არ არსებობს არც ვიდოემტკიცებულება, არ არსებობს მომჩივანი, დაზარალებული, რაღაც მოლოტოვის კოქტეილებს ისროდიო - არც ვიცი, რაზეა ლაპარაკი.
პატივცემულო მოსამართლე, მაინც მრჩება იმედი, რომ ამ ყველაფერს გაითვალისწინებთ და სასამართლო ობიექტურ გადაწყვეტილებას მიიღებს. ალბათ, თქვენც გაძალებენ, აქციაზე დაკავებული ხალხი ციხეში გაუშვათ. თუმცა, გთხოვთ, იყავით სამართლიანი, რომ ხალხს დაუბრუნდეს სასამართლოს მიმართ ნდობა"- თქვა სინდისის პატიმარმა და დასძინა: „ნებდებიან ისინი, ვისთვისაც თავისუფლება აღარაფერს ნიშნავს“. - თქვა "ტვ პირველის" ცნობით, ხომერიკმა.
