არავის ჰქონდეს ის განცდა, რომ კვალიფიკაციის შეცვლის გამო, ჩვენ ამ საქმეს ევროსასამართლოში არ წავიღებთ - ამის შესახებ „კოალიცია ცვლილებისთვის“ წევრის, საბა სხვიტარიძის ადვოკატმა, ირაკლი ჩომახაშვილმა ჟურნალისტებთან საუბრისას განაცხადა.
ჩომახაშვილის თქმით, დაცვის მხარეს წარმოდგენილი ჰყავდა ათეულობით მოწმე, საათობით ვიდეო-ჩანაწერები და სქემაც ისე იყო აწყობილი, რომ შეუძლებელი იყო საბა სხვიტარიძეს სცოდნოდა, რომ ეს ადამიანები, მათ შორის მირიან ქავთარაძე, იყვნენ პოლიციელები.
" ბრალდების მხარემ მიიღო ერთადერთი სწორი გადაწყვეტილება, რომ კვალიფიკაცია შეცვალა. თავად პროკურორმა აღნიშნა, რომ ყოველგვარი ეჭვი უნდა გადაწყდეს ბრალდებულის სასარგებლოდ.
მირიან ქავთარაძე და მასთან ერთად მყოფი პოლიციელები როდესაც ამბობდნენ, რომ ვუთხარით, პოლიციელები ვართო, სასამართლომ კი არა, ეს ბრალდების მხარემაც კი არ დაიჯერა, ამიტომ იცოდნენ კარგად, რომ ეს განაჩენები, როცა დემოკრატია დაბრუნდება ქვეყანაში, კარგად ხელახლა წავიკითხავთ მირიან ქავთარაძის და მისი მეგობრების ნაწილში.
ჩვენ მოვიპოვეთ მტკიცებულება, სადაც ჩანს, რომ პირველადი თავდამსხმელი არის მირიან ქავთარაძე ახალგაზრდა გოგონაზე, მოვიპოვეთ „ქორთიარდ მარიოტის“ ვიდეო-ჩანაწერები და ხვადასხვა ტელეეკრანებზე გასულიპირდაპირი ეთერები და შევადარეთ წამობრივად, საბა სხვიტარიძე როდის მიდიოდა შემთხვევის ადგილას და როდის ხდებოდა კონფლიქიტის დაწყება - ის რომ შეუძლებელი იყო, მათ შორის საუბარი არსებულიყო. ასევე ათეულობით მოწმე წარმოვადგინეთ სასამართლოში დაცვის მხარემ, რომლებმაც ფიცის ქვეშ დაადასტურეს, რომ ამ ადამიანებს ნამდვილად არ უთქვამთ, რომ ა რიან პოლიციელები. არავის არ ჰქონდეს ის განცდა, რომ კვალიფიკაციის შეცვლის გამო, ჩვენ ამ საქმეს ადამიანის უფლებათა ევროპულ სასამართლოში არ წავიღებთ. ამის დრო დადგება და ჩვენ წავიღებთ ამ საქმეს". განაცხადა ირაკლი ჩომახაშვილმა.
„კოალიცია ცვლილებისთვის“ წევრს, საბა სხვიტარიძეს, რომელიც პოლიციელ მირიან ქავთარაძეზე თავდასხმაშია ბრალდებული, პოლიციელზე თავდასხმის ბრალდება გადაუკვალიფიცირდა.
აღნიშნულის შესახებ შუამდგომლობა პროკურატურამ დღევანდელ პროცესზე დააყენა, რაც სასამართლომ დააკმაყოფილა.
უფრო კონკრეტულად, საბა სხვიტარიძეს ბრალი ჰქონდა წაყენებული 353-ე პრიმა მუხლის მეორე ნაწილით, რაც პოლიციელზე თავდასხმას გულისხმობს. აღნიშნული მუხლი მას ახლა 120-ე მუხლით გადაუკვალიფიცირდა, რაც ზოგადად ჯანმრთელობის განზრახ მსუბუქ დაზიანებას გულისხმობს. აღნიშნული მუხლით გათვალისწინებული დანაშაული კი "ისჯება ჯარიმით ან გამასწორებელი სამუშაოთი ვადით ექვს თვემდე ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ერთიდან სამ წლამდე, იარაღთან დაკავშირებული უფლებების შეზღუდვით ან უამისოდ“.
