თორნიკე რიჟვაძის სამწუხარო ამბავი მოხდა გაცილებით ადრე და სამი დღეა კამპანია დაიწყეს, რა ხდება? ეს არის შეკვეთილი, სიმართლე ეს არის, - ამის შესახებ „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ, გადაცემაში „იმედი LIVE” განაცხადა.
მისი თქმით, იმ სახლში, სადაც თორნიკე რიჟვაძის თვითმკვლელობის მცდელობა მოხდა, ნამყოფი არ არის.
„თორნიკე რიჟვაძის სამწუხარო ამბავი მოხდა გაცილებით ადრე და სამი დღეა კამპანია დაიწყეს, რა ხდება? ეს არის შეკვეთილი, სიმართლე ეს არის. ჩვენ ხომ ვიცით, რომ ასეთი რაღაცები პიარული დაგეგმარების გარეშე ასე კოორდინაცია არ ხდება. აქედან „ნაცმოძრაობის“ ერთ-ერთმა წარმომადგენელმა. იქიდან ვიღაც ვითომ ჟურნალისტებმა. „ფეისბუქში“ ასეთი კამპანია მოაწყონ, შემთხვევით არ ხდება. მაინცდამაინც ამ ხალხს არ მინდა პასუხები გავცე და თავი გავუყადრო, მაგრამ ერთი რაღაც ყველამ რომ იცოდეს, იმ სახლში არასდროს ნამყოფი არ ვარ. იმ დღეს კი არა, არასდროს ნამყოფი არ ვარ. მასპინძელთანაც პირადი ნაცნობობა არ მაკავშირებს, მის ძმას ვიცნობ უფრო კარგად, შედარებით, რამდენჯერმე შევხვედრივართ სუფრაზე და ა.შ.
თორნიკეს რაც შეეხება, ვიღაცები ამბობდნენ მამუკას უახლოესი მეგობარიაო, მაგრამ არ არის ჩემი უახლოესი მეგობარი, არც უცხო არ არის ნამდვილად. ჩვენ ვმეგობრობდით კიდეც, თანაგუნდელები ვართ და არ მინდა ვინმემ თორნიკეს ერთი წამით დაუკარგოს ის წლები, რომლის განმავლობაში დღე და ღამეს ასწორებდა ეს ადამიანი, რომ გუნდის საქმე და თავისი რეგიონის, აჭარის საქმე გაეკეთებინა. არ შეიძლება ეს რომ დავუკარგოთ იმ ადამიანს და მას გულწრფელად მადლობა ეკუთვნის იმ გაკეთებული საქმისთვის, რაც ფორმალური არ ყოფილა. არც პრემიერ-მინისტრის მხრიდან, არც ჩვენი მხრიდან, როდესაც ის თანამდებობიდან გადადგა. ეს ერთი, ხაზგასმით.
მეორე, არცერთი ადამიანი, ამაზე პასუხს ვაგებ, არცერთი ადამიანი თორნიკეს, განსაკუთრებით იმ საკითხთან დაკავშირებით, რაც მათ მოიტანეს, ჯერ თვითონ დააბრალეს და შემდეგ ამ დაბრალებულზე თითქოს ჩვენ ვაბრალებდით და ამაზე პასუხს და რაღაცას ვთხოვდით. გარანტირებულად შემიძლია გითხრათ, რომ მსგავსი არათუ მუქარა, არამედ რაიმე კატეგორიული საუბარიც კი მასთან არ ყოფილა. ეს მეორე.
მესამე, ახლა რაც შეეხება დაკვეთას. პრემიერმა, ბატონმა ირაკლი კობახიძემაც და მეც გამოვთქვით ეჭვი, რომელიც შეგვიძლია თამამად ვთქვა, რომ მხოლოდ გონივრული ეჭვი არ არის, ამას გარკვეული დასაბუთებაც აქვს, აქვე მინდა ხაზი გავუსვა, რომ ეს არ შეეხება ჩვენი გუნდიდან წასულ ყველა ადამიანს ან მათ უმრავლესობას, მაგრამ მაინც რბილად ვიტყვი, რომ ზედმეტი გაუგებრობა არ შევიტანო, არსებობს გარკვეული ინფორმაციები, ეჭვი და ლოგიკაც, რაც კიდევ უფრო მნიშვნელოვანია, რომ ამ ხალხს ვიღაც ალაპარაკებს დაკვეთით. ამას შემთხვევით არ ვლაპარაკობ. ყველა მათ სიტყვაში არის დაზღვევა, ვიღაცები რაღაცისგან იზღვევენ თავს. მათ შორის, თორნიკეს საქმესთან დაკავშირებით. მე, მაგალითად, თუ ვიღაც მითითებად და ეკრანიდან მინიშნებად არ ჩამითვლის სამართალდამცავი ორგანოების მიმართულებით, მე რომ ვიყო სამართალდამცავი, დავინტერესდებოდი ასეთი გაცხოველებული აქტიურობით ამ მიმართულებით, გაღმა შედავების პრინციპთან ხომ არ გვაქვს საქმე“, - აღნიშნა მამუკა მდინარაძემ.
