გვყავს ადამიანების კასტა - პარტიული, „ენჯეოშნიკური“, აქტივისტური, რომელიც თავის სამშობლოს მოწყდა, სიტყვა „სამშობლოსაც“ არ აღიარებენ, - ამის შესახებ პარლამენტის თავმჯდომარემ, შალვა პაპუაშვილმა განაცხადა.
„გარკვეული კასტა ჩამოყალიბდა პარტიული, NGO და ისე აქტივისტების ნაზავი, თავის თავს რომ ეძახიან, გულწრფელი მოქალაქე ვართო, ეს არაგულწრფელი ხალხი. გარკვეული კასტა არის, რომლებიც სხვა ქვეყნის დროშებს შემოიფარებენ ხოლმე, შემდეგ სხვა კონსტიტუციას იფიცებენ და სხვა ქვეყნის პოლიტიკოსებზე ამოსდით მზე და მთვარე. ფაქტობრივად, ჩვენი საზოგადოებისთვის დაკარგული მოქალაქეები არიან, რომლებსაც ფორმალურად, ჯიბეში საქართველოს პასპორტი უდევთ, მაგრამ რეალურად, მათი გული სხვა ქვეყნების თუ ჯგუფების ინტერესებით ძგერს.
სინამდვილეში, მთავარი პრობლემა, რაც ჩვენს საზოგადოებას უდგას არის ის, რომ გვყავს ადამიანების კასტა - პარტიული, „ენჯეოშნიკური“, აქტივისტური, რომელიც თავის სამშობლოს მოწყდა, სიტყვა „სამშობლოსაც“ არ აღიარებენ. მათთვის ტერმინი „სამშობლო“ აღარ არსებობს. არიან გარკვეული ლიბერალური ინტერნაციონალის ნაწილი, სადაც თუკი ადრე გვეუბნებოდნენ, რომ პროლეტარები ყველა ქვეყნის უნდა გაერთიანდეთო, ახლა ესენი ამბობენ - ლიბერალები ყველა ქვეყნისა უნდა გაერთიანდეთო. მნიშვნელობა არ აქვს ქართველი ხარ, გერმანელი, ფრანგი თუ ვინ, შენ გაქვს საერთო ინტერესიო. ქართველი ხარ თუ ლატვიელი, ორივეს ერთი ინტერესი გვაქვს. მერე გამოვა ლატვიის დაზვერვის სამსახური და იტყვის: არა გენაცვალე, თქვენ იომეთ, რომ ჩვენ წყნარად ვიყოთ, ეს არის ჩვენი ინტერესიო. ამას ეუბნებიან და ესენიც ამ ყველაფერს ხბოს თვალებით შეჰყურებენ და ამბობენ, კი ბატონო უცხოელებო, გვითხარით რაღაც იმიტომ, რომ თქვენ ხართ ჩვენი გურუ და წინამძღოლი“, -განაცხადა პაპუაშვილმა.
