ესტონეთი მზად არის, გადასცეს კიევს გაწვევის ასაკის უკრაინელი კაცები. ამის შესახებ ესტონეთის საგარეო საქმეთა მინისტრმა, ლაური ლიაენმეტსმა განაცხადა.
მინისტრის თქმით, საერთაშორისო კანონმდებლობის შესაბამისად, უკრაინას არ შეუძლია ესტონეთში მცხოვრები უკრაინელების მობილიზება, რადგან ამას სახელმწიფოებს შორის შეთანხმება სჭირდება.
ლიანმეტსი აპირებს ოფიციალურად აცნობოს უკრაინის ხელისუფლებას, რომ თუ მათ სურთ ესტონეთში მყოფი უკრაინელი მოქალაქეების ჯარში გაწვევა, მაშინ ესტონეთი მზად არის დადოს ასეთი შეთანხმება უკრაინასთან.
„ესტონეთი გვერდზე არ გადგება. ეს თუ სჭირდება უკრაინას, ესტონეთს შეუძლია ამ ადამიანების პოვნა და მათი უკრაინისთვის გადაცემა. ზოგადად, ჩვენ ვიცით, სად არიან და რითი არიან დაკავებულები, უმრავლესობა დადის სამსახურებში. მათ აქვთ ესტონეთში ბინადრობის უფლება“, – განაცხადა ესტონეთის საგარეო უწყების ხელმძღვანელმა.
21 დეკემბერს რამდენიმე გერმანულ გამოცემაში გავრცელდა უკრაინის თავდაცვის მინისტრის რუსტემ უმეროვის განცხადა, რომელშიც ის ამბობს, რომ უკრაინის მთავრობა გეგმავს, ჯარში გაიწვიოს საზღვარგარეთ მყოფი უკრაინელი კაცები. ამის შემდეგ, უკრაინის თავდაცვის სამინისტროში განმარტეს, რომ უმეროვი ზოგადად საუბრობდა რეკრუტინგზე და იმაზე, რომ აუცილებელია ქვეყნის გარეთ მყოფ უკრაინელებმა იცოდნენ, თუ რამდენად მნიშვნელოვანია, რომ ისინი ჯარს შეუერთდნენ.
