ევროკავშირის საბჭომ ბელორუსის წინააღმდეგ სანქციების მეხუთე პაკეტი დაამტკიცა.
ამავდროულად, შეერთებულმა შტატებმა, დიდმა ბრიტანეთმა და კანადამ განაცხადეს, რომ მხარს დაუჭერენ ევროკავშირის სანქციებს ბელორუსის რეჟიმის წინააღმდეგ.
აშშ-ის სანქციები, ხაზინის დეპარტამენტის ცნობით, ეხება ბელარუსის სუვერენულ ვალს, 20 ფიზიკურ და 12 იურიდიულ პირს, მათ შორის ბელარუსის მმართველის ალიაქსანდრ ლუკაშენკას შვილს დმიტრს. სანქციების ქვეშ მოექცნენ ბელარუსული კალიუმის კომპანია, "ტრანსავიაექსპორტი" და "ბელტექექსპორტი".
ევროკავშირის სანქციები დაეკისრა 17 ფიზიკურ და 11 იურიდიულ პირს, კერძოდ, ბელარუსის სასაზღვრო ჯარების სარდლობის წარმომადგენლებს, საგარეო საქმეთა სამინისტროსა და სასამართლოს თანამშრომლებს, სახელმწიფო ავიაკომპანია Belavia-ს, ტურისტული სექტორის საწარმოებს და სასტუმროებს, ასევე "ბელარუსნეფტს".
გარდა ამისა, შეზღუდვები დაუწესდა სირიულ ავიაკომპანია Cham Wings-ს მიგრანტების უკანონო ტრანსპორტირებისა და კონტრაბანდის გამო.
ეს სანქციები მოიცავს სანქცირებულ პირთა ევროკავშირის ტერიტორიაზე არსებული ყველა აქტივის გაყინვას. ევროპელ ფიზიკურ პირებსა და კომპანიებს ეკრძალებათ სიაში მყოფთათვის სახსრების ან რესურსების მიწოდება. გარდა ამისა, პირებს სანქცირებულთა სიიდან ეკრძალებათ ევროკავშირის ქვეყნებში შესვლა.
2020 წლის 9 აგვისტოს დასავლეთის მიერ არაღიარებული ბელარუსის საპრეზიდენტო არჩევნების შემდეგ, ევროკავშირმა შემოიღო პერსონალური სანქციების ოთხი პაკეტი ლუკაშენკას რეჟიმის წინააღმდეგ. მათგან სამი - გასულ წელს, მეოთხე - მიმდინარე წლის ივნისში. ოთხი პაკეტის შედეგად სანქციების სიაში 166 პირი მოხვდა, მათ შორის თავად ლუკაშენკა, ასევე 15 დაწესებულება და საწარმო.
გარდა ამისა, 2021 წლის ივნისში ევროკავშირმა ბელარუსის წინააღმდეგ ეკონომიკური სანქციები შემოიღო. მათ შორის არის ნაწილობრივი შეზღუდვები ქვეყნიდან კალიუმის სასუქებისა და ნავთობპროდუქტების იმპორტზე.