ბოლო ორი დღეა ქრისტიანული და მუსლიმანური სამყაროს ყურადღება ერაყისკენ არის მიპყრობილი, სადაც რომის კათოლიკური ეკლესიის წინამძღვრის, პაპი ფრანცისკეს ისტორიული ვიზიტი მიმდინარეობს.
რომის პაპი ისტორიაში პირველად ეწვია ერაყს.
ერაყის ქალაქ ნაჯაფში უკვე შედგა რომის პაპი ფრანცისკესა და შიიტური ისლამის მაღალიერარქ დიდ აიათოლა ალი ალ-სისტანის შორის. ისტორიულ ვიზიტს თვეების განმავლობაში გეგმავდნენ აიათოლას ადმინისტრაცია და ვატიკანი.
რომის პაპის აიათოლას რეზიდენციაში შესვლისთანავე რამდენიმე თეთრი მტრედი გაათავისუფლეს მშვიდობის ნიშნად.
დახურულ კარს მიღმა, პაპმა და აიათოლამ განიხილეს ერაყელი ქრისტიანების უმცირესობის პრობლემები.
როგორც ცნობილია, აიათოლა ალი ალ-სისტანის დიდი ავტორიტეტი აქვს შიიტ მუსლიმებს შორის და მისი მოსაზრებები რელიგიურ თუ სხვა საკითხებზე დიდი პატივისცემით სარგებლობს.
შეხვედრის დასრულების შემდეგ, აიათოლამ გაავრცელა განცხადება, სადაც აღნიშნულია, რომ ერაყელ ქრისტიანებს ისეთივე უფლებები უნდა ჰქონდეთ, როგორც სხვა ერაყელებს.
ერაყის მცირერიცხოვანი ქრისტიანებისთვის აიათოლას სოლიდარობის გამოვლენას დიდი მნიშვნელობა აქვს, რადგან ეს მათ დაეხმარება თავიანთი უფლებების დაცვაში.
პაპის ვიზიტი ერაყის ცენტრალური ტელევიზიით პირდაპირ ეთერში გადაიცემოდა. მოსახლეობა აღნიშნავდა, რომ ორი რელიგიური პატივსაცემი ლიდერის შეხვედრას დიდ მნიშვნელობას ანიჭებენ და მიესალმებიან.
"ჩვენ მივესალმებით პაპის ვიზიტს ერაყში და განსაკუთრებით წმინდა ქალაქ ნაჯაფში და მის შეხვედრას დიდ აიათოლა ალი ალ-სისტანთან. ეს ისტორიული ვიზიტია და იმედი მაქვს, რომ ეს კარგი იქნება ერაყისა და ერაყელი ხალხისთვის", - აცხადებს ქალაქ ნაჯაფის მკვიდრი.
თავის მხრივ, რომის პაპმა მადლობა გადაუხადა აიათოლას, რადგან მან ხმა აიმაღლა "ყველაზე დაჩაგრულებისა და დევნილების დასაცავად".
აიათოლასთან შეხვედრის შემდეგ, რომის პაპი უძველეს ქალაქ ურში გაემგზავრა, რომელსაც სხვადასხვა კონფესიის წარმომადგენლები წმინდა ქალაქად მიიჩნევენ, რადგან ბიბლიური გადმოცემით, აქ დაიბადა იუდეველთა, ქრისტიანთა და მაჰმადიანთა წმინდა მამამთავარი აბრაამი.
მოგვიანებით, რომის პაპში ბაღდადში კათოლიკურ მესას აღავლენს.
