საქართველოს მოქალაქეებისთვის საზღვარს საფრანგეთიც გახსნის. გავრცელებულ ინფორმაციას ადასტურებს საქართველოში საფრანგეთის ელჩი დიეგო კოლასი.
"შემიძლია დავადასტურო, რომ საფრანგეთს საზღვრები საქართველოს მოქალაქეებისთვისაც გაიხსნება", - დაწერა კოლასმა მიკრობლოგ "ტვიტერზე".
მანამდე Euronews-ი იტყობინებოდა, რომ საფრანგეთმა სრულად გაითვალისწინა ევროკავშირის საბჭოს რეკომენდაცია და საზღვარს ე.წ. უსაფრთხო ქვეყნებად გამოცხადებულ თხუთმეტივე სახელმწიფოს გაუხსნა.
შეგახსენებთ, გუშინ ევროკავშირის საბჭომ გამოაქვეყნა იმ ქვეყნების ჩამონათვალი, რომლებისთვისაც 1-ლი ივლისიდან საზღვრების გახსნა რეკომენდებულია. მანამდე საქართველოს მთავრობამ რეგულარულ ფრენებზე დაშვება უკვე მეოთხედ, 1-ელ აგვისტომდე გადაავადა.
ამ დროისთვის, საქართველოსთვის საზღვრის გახსნის გადაწყვეტილება მიიღეს საფრანგეთმა, ნიდერლანდებმა, გერმანიამ და ესპანეთმა.