ვიცე-პრემიერის გიორგი ბარამიძის შეფასებით, ოკუპირებულ ტერიტორიებზე პროვოკაციების მოწყობით რუსეთი სასურველი გარემოს შექმნას ცდილობს, რათა შემდეგ ქართველი ხალხის მიერ არჩეული ხელისუფლება საკუთარი ძალებით ჩაანაცვლოს. ამის შესახებ "ჯი-ეიჩ-ენს" გიორგი ბარამიძემ ცხინვალში ბოლო დროს განვითარებული მოვლენების კომენტირებისას განუცხადა.
"ცხინვალის რეგიონი საქართველოს განუყოფელი ნაწილია, ისევე როგორც აფხაზეთი და იქ მცხოვრებ ჩვენი მოქალაქეების უფლების დარღვევაზე ჩვენ მწვავე რეაქციები ყოველთვის გვექნება. იმედი გვაქვს, საერთაშორისო თანამეგობრობა შეძლებს, რომ 20 მარტს ცხინვალში დაგეგმილი აქცია დესტაბილიზაციის მიზეზი არ გახდეს, რომელიც რუსეთის ხელისუფლების ინტერესებში შედის. კრემლი ცდილობს ყველა პროვოკაცია თავის სასარგებლოდ გამოიყენოს, რომ საქართველოს ხელისუფლების ჩამშალოს და ქვეყნის სათავეში თავის ძალები მოიყვანოს", - აღნიშნა ბარამიძემ.
მისი შეფასებით, მიუხედავად იმისა, რომ ევროკავშირის დამკვირვებლებს ოკუპირებულ რეგიონში არ უშვებენ, მათ ადმინისტრაციულ საზღვრებთან ყოფნას სტაბილურობის თვალსაზრისით მანც დიდი მნიშვნელობა აქვს.
შეგახსენებთ, რომ 20 მარტს ცხოინვალში კოკოითის მარიონეტული რეჟიმის წინააღმდეგ ადგილობრივი ოპოზცია მიტინგს გამართავს.
