საქართველოს პრეზიდენტის ადმინისტრაციის უფროსი ანდრო ბარნოვი სასჯელაღსრულების, პრობაციის და იურიდიული დახმარების საკითხთა მინისტრის სოზარ სუბარის თანამდებობიდან გადადგომას ითხოვს.
როგორც ბარნოვმა დღეს გამართულ ბრიფინგზე აღნიშნა, ქუთაისის მეორე საპყრობილეში 16 წლის პატიმრის გარდაცვალებს ფაქტთან დაკავშირებით სასჯელაღსრულების სამინისტროს ოფიციალური ვერსია ძნელად დასაჯერებელია და მთავრობას აღნიშნულზე პასუხისმგებლობის სრულად აღებისკენ მოუწოდებს.
"სამწუხაროდ, ციხეებში გვაქვს დრამატული სიტუაცია. მინდა ამ მთავრობას მოვუწოდო, რომ იმ პირობებში, როდესაც ისინი გვპირდებოდნენ გასაოცარ დემოკრატიას, საზოგადოება მიესალმება იმას, თუ ისინი აიღებენ პასუხისმგებლობას და დააყენებენ მინისტრის პასუხისმგებლობის საკითხს არა მხოლოდ იმიტომ, რომ მან ვერ აღკვეთა ეს ტრაგიკული ფაქტი, რომელიც მისი პირდაპირი პასუხისმგებლობა იყო, არამედ იმიტომაც, რომ ის ძალიან ზერელედ ეკიდება ამ ფაქტს და დღეს ჩვენ გვთავაზობს ვერსიას, რომლისაც ალბათ თავადაც არ სჯერა,"- განაცხადა ანდრო ბარნოვმა.
შეგახსენებთ, რომ ქუთაისის მეორე საპყრობილეში არასრულწლოვანი პატიმარი გუშინ გარდაიცვალა. ქურდობის ბრალდებით დაკავებული 16 წლის სენაკელი საპატიმროში ორი დღის წინ შეიყვანეს. ახალგაზრდა სასჯელს უკვე მეორედ იხდიდა. პრეზიდენტმა ის მარიამობის დღესასწაულზე შეიწყალა.