საქართველოს პრემიერ-მინისტრს ბიძინა ივანიშვილს რამდენიმე მინისტრის საქმიანობასთან დაკავშირებით კითხვები აქვს.
როგორც ივანიშვილმა დღეს ექსპერტებთან შეხვედრაზე აღნიშნა, "ამჟამინდელ მთავრობაში არიან კარგი მინისტრები და ძალიან კარგი მინისტრები, თუმცა ვინაა კარგი და ვინ - ძალიან კარგი, ამაზე საჯაროდ პოლიტიკიდან მისი წასვლის შემდეგ ისაუბრებს".
"დღევანდელი მინისტრები ძალიან წელში გამართულები არიან. ჩვენ გვყავს კარგი და ძალიან კარგი მინისტრები. შემიძლია, როდესაც მთავრობიდან წავალ, პირდაპირ ვთქვა, ვის ვგულისხმობ, რომ ვინ არის კარგი და ვინ - ძალიან კარგი. შეიძლება, ერთ-ორ კაცზე არსებობდეს შეკითხვა, მაგრამ დაალაგებენ ისინი რა შეკითხვებიც არსებობს. ეჭვები არის ერთ-ორ კაცზე, მაგრამ ჩემი აზრით, სწორდებიან ისინი და ამას არასდროს არ ვიტყვი, თუ თავად გამოსწორდებიან და ბოლომდე გულწრფელად მოემსახურებიან თავიანთ ქვეყანას. ყველამ თავისი საქმე იცის. ვაკონტროლებ რა თქმა უნდა. ამას ჩემზე კარგად შეძლებს ახალი პრემიერ-მინისტრი, რადგან მხოლოდ ამ საქმით იქნება დაკავებული", - განაცხადა ბიძინა ივანიშვილმა.