გაეროს გენერალური ასამბლეის 68-ე სესიის ფარგლებში საქართველოს საგარეო საქმეთა მინისტრი მაია ფანჯიკიძე ნიუ-იორკში ორმხრივ შეხვედრებს მართავს. ფანჯიკიძე თავის ირანელ კოლეგას შეხვდა.
მხარეებმა ორმხრივი ურთიერთობები განიხილეს. განსაკუთრებული ყურადღება დაეთმო ეკონომიკურ და კულტურულ საკითხებს.
საქართველოს ევროინტეგრაციისკენ სწრაფვაზე იყო საუბარი საქართველოსა და ხორვატიის მთავარი დიპლომატების შეხვედრისას.
გარდა ამისა, დიპლომატიური ურთიერთობების დამყარების შესახებ დოკუმენტს მოეწერა ხელი საქართველოსა და ლესოტოს საგარეო უწყებებს შორის.
ასევე გაფორმდა ურთიერთგაგების მემორანდუმი კოლუმბიასა და კირიბატთან.
„ძალიან დიდია ირანელთა რაოდენობა, რომლებიც ჩამოდის საქართველოში, ინტერესდება საქართველოთი, არა მხოლოდ როგორც ტურისტი, არამედ ბიზნესის კეთების კუთხითაც. ამიტომ ლოგიკური იყო, რომ ახალ კოლეგას და იგი ახალია როგორც მოგეხსენებათ, ირანის საგარეო საქმეთა მინისტრი მე პირველად შევხვდი და მისთვისაც საინტერესო იყო ჩემთან შეხვედრა. რადგან ჩვენ ფაქტიურად მეზობლები ვართ და საკმაოდ ინტენსიური ურთიერთობა გვაქვს", _ განაცხადა მაია ფანჯიკიძემ.
