როგორც სააკაშვილმა ამერიკის შეერთებულ შტატებში ოფიციალური ვიზიტით ყოფნისას განაცხადა, გაერო-ში მისი სიტყვით გამოსვლისას მხოლოდ საქართველოს ოკუპირებული ტერიროტიების მიმდებარედ განვითარებულ მოვლენებზე ისაუბრებს, თუმცა მხოლოდ მისი საუბარი საკმარისი არ იქნება.

ამასთან, პრეზიდენტი საქართველოს მთავრობას და სახელისუფლებო სტრუქტურებს აღნიშნული საკითხის ოპტიმალური გზებით გადაჭრისთვის გაერთიანების და ერთობლივი ძალისხმევის წარმართვისკენ მოუწოდებს.

"ბოლო თვეების განმავლობაში ჩვენ დავკარგეთ კონტროლი უფრო მეტ სასოფლო-სამეურნეო მიწაზე, ვიდრე იყო ქურთაში და თამარაშენში, ოღონდ იმ პირობებში, როდესაც ამის შესახებ პრაქტიკულად ვერავინ ვერ გაიგო და რუსეთმა არანაირი პოლიტიკური ფასი არ გადაიხადა. ხომ ამბობდნენ ხშირად, რომ ყველაფერი იმის ბრალი იყო, რომ პუტინი მე ვერ მიტანდა?! ახლა ხომ დავრწმუნდით, რომ რუსტი ანხორციელებს გეგმაზომიერ შეტევას საქართველოს სუვერენიტეტზე და საზღვრებზე მიუხედავად იმისა, ვინ არის საქართველოს ხელისუფლებაში. პატარა ქვეყნისთვის თავისი პოზიციების დაცვის ერთადერთი შანსი არის საერთაშორისო სამართალი და საერთაშორისო მხარდაჭერა. ბოლო თვეებში ყველა ინტერვიუში, დასავლურ გამოცემებთან საქართველოს პრემიერ-მინისტრი იმეორებს, რომ ომი იყო საქართველოს ბრალი, რომ საქართველოს როგორც ქვეყანას არ უნდა გვქონდს არც მსოფლიო, არც რეგიონალური ამბიციები და მნიშვნელობა. თუ მნიშვნელობა არ გვაქვს, თუ ყველაფერი ჩვენი ბრალი იყო, ვინ მოვა ჩვენს დასაცავად?!,"- განაცხადა მიხეილ სააკაშვილმა.

პრეზიდენტის თქმით, "ჩვენი ოფიციალური პირების ლექსიკიდან გაქრა სიტყვა ოკუპაცია და ამის გამო, ამერიკელებმა და ევროპელებმაც შეწყვიტეს ოკუპაციაზე ლაპარაკი".

ასევე, საქართველოს პრეზიდენტი მიიჩნევს, რომ "ამ ერთი წლის განმავლობაში უპრეცედენტო ფაქტია საქართველოს ისტორიაში, რომ ქვეყნის პრემიერ-მინისტრი ოფიციალური ვიზიტით მიწვეული არც ამერიკის შეერთებულ შტატებში და არც დასავლეთ ევროპის რომელიმე ქვეყანაში ყოფილა".

" ამასობაში, ჩვენი ოკუპირებული ქვეყნის პროკურორი ერთი კვირა იმყოფებოდა ოკუპანტი ქვეყნის დედაქალაქ მოსკოვში და ბევრი სხვა გაუგებარი რევერანსი გაკეთდა. ეს არის სისუსტის გამოსხივება. რუსეთს ცბიერებით და ვითომ ეშმაკობით ამ საკითხებში ვერავინ მოუგებს, მაგრამ რუსეთის ოკუპაციის უკან დახევა შესაძლებელია მწყობრი საერთასორისო მხარდაჭერის მოპოვების პირობებში და არა იმ პირობებში, როცა ამერიკის კონგრესი იღებს რეზოლუციებს, რომ საქარტველოში დემოკრატია არ არის. ადრე იღებდნენ რეზოლუციებს, რომ საქართველოს დეოკუპაცია მოხდეს, ახლა რეზოლუციას დემოკრატიაზე და სხვადასხვა კრიტიკულ თემებზე იღებენ. ჩვენ ახლა გვჭირდება ერთიანობა, მე გაეროში მხოლოდ ამ საკითხებზე ლაპარაკს ვაპირებ, მაგრამ მხოლოდ ჩემი ლაპარაკი არ არის საკმარისი. ყველა ქარტულმა პოლიტიკურმა ძალამ, მთავრობამ და მეც, ყველამ უნდა გამოვიჩინოთ ერთიანობა, სიმტკიცე და ყველამ უნდა გამოვავლინოთ, რომ გვიყვარს ჩვენი სამშობლო და მზად ვართ ვიბრძოლოთ მისი ინტერესებისთვის,"- განაცხადა მიხეილ სააკაშვილმა.

ცნობისთვის, 22 სექტემბერს ოკუპირებული ცხინვალის რეგიონის მოსაზღვრე სოფელ დვანთან რუსმა სამხედროებმა სადემარკაციო სამუშაოები განაახლეს. საოკუპაციო ზოლის 400 - 500 მეტრით გადმოწევის შედეგად, საქართვლოს ხელისუფლების მიერ არაკონტროლირებად ტერიტორიაზე 10 ჰექტარამდე მიწის ფართობი და მასზე არსებული სახნავ-სათესი მიწები და მოსახლეობის ხეხილის ბაღები მოექცა.

ე.წ. სამხრეთ ოსეთის წარმომადგენლებმა ოკუპირებული ცხინვალის რეგიონის მოსაზღვრე სოფელ დვანის მოსახლეობას სადემარკაციო სამუშაოების განახლების შედეგად ოკუპირებულ ზონაში მოხვედრილ ტერიტორიებზე არსებული მოსავლის ასაღებად თავდაპირველად 10 დღიანი ვადა მისცეს, თუმცა მოგვიანებით წინადადება შეიცავალა და ახალი ბრძანების თანახმად, ადგილობრივებმა მაქსიმალურად მოკლე ვადებში უნდა მოასწრონ საშემოდგომო მოსავლის დაბინავება.

სოფელ დვანთან მიმდინარე სადემარკაციო სამუშაოებს ევროკავშირის სადამკვირვებლო მისიის წარმომადგენლები აკვირდებიან და მოსახლეობას მოსავლის მაქსიმალურად სწრაფად აღებისკენ მოუწოდებენ, რათა წინააღმდეგ შემთხვევაში, ე.წ. საზღვრის გადაკვეთის ბრალდებით მათი დაკავება არ მოხდეს.