"რუსეთმა ცალსახად გაიგოს ყველასგან, რომ არაფრის ფასად საქართველო არ შეეგუება თუნდაც მტკაველი მიწის დაკარგვას,"- ამის შესახებ საქართველოს იუსტიციის მინისტრმა თეა წულუკიანმა რუსი სამხედროების მიერ ოკუპირებული ცხინვალის რეგიონის მოსაზღვრე სოფელ დვანთან მავთულხლართების გავლების პროცესის განახლების ფაქტის კომენტირებისას ისაუბრა.
"წინ გადადგმული ნაბიჯია, რომ ევროკავშირი დღეს უკვე ცალსახად ამბობს იმას, რაც აქამდე არ უთქვამს, რომ ეს არის მიუღებელი. ამგვარი მკვეთრი განცხადებები ძალიან გვჭირდება. ჩვენ მშვიდობიანი გზით, სხვათა შორის რუსეთთან დიალოგის შედეგად მივაღწევთ იმას, რომ ჩვენი ტერიტორია რაც შეიძლება მალე იყოს დეოკუპირებული. ის, რომ საზღვარი მოცოცავს და მცოცავი ოკუპაციაა, თუ ეს რუსეთის მიერ განიხილება ჩვენზე ზეწოლად იმისთვის, რომ ევროკავშირის გეგმებზე ვთქვათ უარი, ჩვენ ევროკავშირზე უარს ამის გამო არ ვიტყვით,"- განაცხადა თეა წულუკიანმა.
ცნობისთვის, 22 სექტემბერს ოკუპირებული ცხინვალის რეგიონის მოსაზღვრე სოფელ დვანთან რუსმა სამხედროებმა სადემარკაციო სამუშაოები განაახლეს. საოკუპაციო ზოლის 400 - 500 მეტრით გადმოწევის შედეგად, საქართვლოს ხელისუფლების მიერ არაკონტროლირებად ტერიტორიაზე 10 ჰექტარამდე მიწის ფართობი და მასზე არსებული სახნავ-სათესი მიწები და მოსახლეობის ხეხილის ბაღები მოექცა.
ე.წ. სამხრეთ ოსეთის წარმომადგენლებმა ოკუპირებული ცხინვალის რეგიონის მოსაზღვრე სოფელ დვანის მოსახლეობას სადემარკაციო სამუშაოების განახლების შედეგად ოკუპირებულ ზონაში მოხვედრილ ტერიტორიებზე არსებული მოსავლის ასაღებად თავდაპირველად 10 დღიანი ვადა მისცეს, თუმცა მოგვიანებით წინადადება შეიცავალა და ახალი ბრძანების თანახმად, ადგილობრივებმა მაქსიმალურად მოკლე ვადებში უნდა მოასწრონ საშემოდგომო მოსავლის დაბინავება.
სოფელ დვანთან მიმდინარე სადემარკაციო სამუშაოებს ევროკავშირის სადამკვირვებლო მისიის წარმომადგენლები აკვირდებიან და მოსახლეობას მოსავლის მაქსიმალურად სწრაფად აღებისკენ მოუწოდებენ, რათა წინააღმდეგ შემთხვევაში, ე.წ. საზღვრის გადაკვეთის ბრალდებით მათი დაკავება არ მოხდეს.
