„ქართულმა ოცნებამ" დაიწყო „ნაციონალური მოძრაობის" ხელისუფლების ტრადიციებით, „სახალხო კრების" სამართლიანი მოთხოვნების იგნორირება, აღნიშნულის „სახალხო კრების" აღმასრულებელი საბჭოს განცხადებაში.
"ჯი-ეიჩ-ენი" აღნიშნულ განცხადებას გთავაზობთ უცვლელად:
"19 სექტემბერს „სახალხო კრებამ" წერილით მივმართეთ პარლამენტის თავმჯდომარეს და საპარლამენტო უმრავლესობას, საპრეზიდენტო კანდიდატებისათვის სატელევიზიო სივრცეში შექმნილი უსამართლო და არათანაბარი პირობების გამოსწორების მოთხოვნით.
დღემდე ჩვენს წერილს არანაირი გამოხმაურება არ მოჰყოლია. ძალიან სამწუხაროა, რომ კოალიცია „ქართულმა ოცნებამ" დაიწყო „ნაციონალური მოძრაობის" ხელისუფლების ტრადიციებით „სახალხო კრების" სამართლიანი მოთხოვნების იგნორირება.
პრემიერ-მინისტრ ბიძინა ივანიშვილის განცხადებები არჩევნების დემოკრატიულად ჩატარების და ყველა კანდიდატისათვის თანაბარი პირობების შექმნის შესახებ იმედის მომცემი იყო თითოეული ჩვენგანისათვის. სამწუხაროდ, ეს დაპირებები დღემდე მხოლოდ განცხადებებად რჩება, ვინაიდან პარლამენტმა არავითარი საკანონმდებლო ცვლილება არ განახორციელა საარჩევნო გარემოს რეალური გაუმჯობესებისათვის.
ჩვენ, „სახალხო კრების" აღმასრულებელი საბჭო, კიდევ ერთხელ ხაზგასმით ვაცხადებთ, რომ წინასაარჩევნო პერიოდში ხელოვნურად შექმნილი მდგომარეობა ორ სახელისუფლებო საპრეზიდენტო კანდიდატს ერთმნიშვნელოვნად უპირატეს პირობებში აყენებს. დღეს არსებული მდგომარეობა ქმნის თანაბარ პირობებს მხოლოდ ორი სახელისუფლებო კანდიდატისათვის, რაც აჩენს ეჭვს, რომ ყველასათვის მიუღებელი და გაუგებარი კოჰაბიტაცია უკვე მჭიდრო თანამშრომლობაში გადაიზარდა კოალიცია „ქართულ ოცნებასა" და „ნაციონალურ მოძრაობას" შორის.
ორი სახელისუფლებო პარტია სრულად აკონტროლებს საარჩევნო კომისიებს, ბიუჯეტიდან ჰყავთ დაფინანსებული 40 ათასზე მეტი დამკვირვებელი, რაც პრაქტიკულად მთელი არმიაა, ერთ შემთხვევაში მინისტრები, ხოლო მეორე შემთხვევაში გამგებლები ჩართულები არიან მათ წინასაარჩევნო კამპანიებში, ამ პირობებში წარმოუდგენელია საუბარი თანაბარ და სამართლიან წინასაარჩევნო გარემოზე.
სახელისუფლებო პოლიტიკური ძალები, რომლებიც ისედაც, რბილად რომ ვთქვათ, არ განიცდიან ფინანსებისა და ე.წ. შემოწირულობების სიმწირეს, ხოლო ბოლო დროს მიღებული საკანონმდებლო ცვლილებების შედეგად გაიოთხმაგეს შემოსავლები სახელმწიფო ბიუჯეტიდან, დამატებით სარგებლობენ უფასო სარეკლამო დროით ტელევიზიებში. ამ ფონზე საპრეზიდენტო კანდიდატ ნინო ბურჯანაძეს საკუთარი ხმის, საკუთარი გზავნილების მისაწვდენად საქართველოს მოსახლეობისათვის, წუთში რამდენიმე ათასი დოლარის გადახდა მოუწევს, რაც პრაქტიკულად წარმოუდგენელია.
კოალიცია „ქართული ოცნებაში" შემავალმა პარტიებმა, რომლებიც თავის დროზე სააკაშვილის ხელისუფლებას სთხოვდნენ საარჩევნო გარემოს გაუმჯობესებას ჯერ „რვიანის", ხოლო შემდეგ „ექვსიანის" ფორმატში, ხელისუფლებაში მოსვლის შემდეგ არაფერი გააკეთეს მაშინდელი, თავიანთივე მოთხოვნების ასასრულებლად.
ვინ გიშლით ხელს ბატონებო, რომ წლების მანძილზე, თქვენივე შემუშავებული მოთხოვნები ახლა უკვე ხელისუფლებაში მყოფებმა განახორციელოთ?
„სახალხო კრება" მიმართავს საქართველოში აკრედიტებულ დიპლომატიურ კორპუსს, საერთაშორისო ორგანიზაციების წარმომადგენლებს, არასამთავრობო და უფლებადამცველ ორგანიზაციებს, რომ მოახდინონ შესაბამისი რეაგირება აღნიშნულ მდგომარეობასთან დაკავშირებით.
„სახალხო კრება" კატეგორიულად მოითხოვს საქართველოს ხელისუფლებისაგან, რომ გამოასწოროს არსებული უსამართლობა, სასწრაფოდ გაატაროს შესაბამისი ღონისძიებები, რათა ყველა პრეზიდენტობის კანდიდატს ჰქონდეს თანაბარი საარჩევნო პირობები და არ იყოს დისკრიმინაციულ მდგომარეობაში ჩაყენებული ქალბატონი ნინო ბურჯანაძე; ყველა პრეზიდენტობის კანდიდატს ჰქონდეს საკუთარი გზავნილების ამომრჩევლამდე მიტანის საშუალება, ხოლო ხალხს გააზრებული არჩევანის გაკეთების უფლება. მით უფრო, რომ ყველა დასავლურ სახელმწიფოში პრეზიდენტობის კანდიდატების თანაბარ პირობებში ჩაყენება საყოველთაოდ მიღებული პრაქტიკა და იმპერატიული ნორმაა"- ნათქვამია განცხადებაში.
