"ოკუპაციური რეჟიმი დიდ ხანს ვერ გაგრძელდება და რუსეთის საოკუპაციო ჯარებს საქართველოდან გასვლა მოუწევთ,"- ამის შესახებ ევროპული და ევროატლანტიკური ინტეგრაციის საკითხებში სახელმწიფო მინისტრმა ალექსი პეტრიაშვილმა რუსი სამხედროების მიერ ოკუპირებული ცხინვალის რეგიონის მოსაზღვრე სოფელ დვანთან მავთულხლართების გავლების პროცესის განახლების ფაქტის კომენტირებისას ისაუბრა.
"უნდა აღინიშნოს, რომ საქართველოს ხელისუფლება არ წამოეგება რუსეთის მხრიდან ამ დაგეგმილ პროვოკაციებს, ვინაიდან ეს არაფერია სხვა, გარდა მცდელობა იმისა, რომ ჩაიშალოს რუსეთსა და საქართველოს შორის ურთიერთობების ნორმალიზების დაწყებული პროცესი. ოკუპაციური რეჟიმი დიდ ხანს ვერ გაგრძელდება და რუსეთის საოკუპაციო ჯარებს საქართველოდან გასვლა მოუწევთ,"- განაცხადა ალექსი პეტრიაშვილმა.
ცნობისთვის, 22 სექტემბერს ოკუპირებული ცხინვალის რეგიონის მოსაზღვრე სოფელ დვანთან რუსმა სამხედროებმა სადემარკაციო სამუშაოები განაახლეს. საოკუპაციო ზოლის 400 - 500 მეტრით გადმოწევის შედეგად, საქართვლოს ხელისუფლების მიერ არაკონტროლირებად ტერიტორიაზე 10 ჰექტარამდე მიწის ფართობი და მასზე არსებული სახნავ-სათესი მიწები და მოსახლეობის ხეხილის ბაღები მოექცა.
