"გარკვეული პერსპექტივები ასე თუ ისე ჩანს, რომ თითქოს ისახება და ამ ფონზე ეს პროცესი და ეს მოვლენა აბსოლუტური გაუგებრობაა,"- ამის შესახებ საპარლამენტო უმრავლესობის ლიდერმა დავით საგანელიძემ რუსი სამხედროების მიერ ოკუპირებული ცხინვალის რეგიონის მოსაზღვრე სოფელ დვანთან მავთულხლართების გავლების პროცესის განახლების ფაქტის კომენტირებისას ისაუბრა.
"მე არ მგონია, რომ ეს გაკვეულად იმართებოდეს იმ ცენტრიდან, რომელი ცენტრიდანაც ასე თუ ისე ინფორმაცია მიეწოდება კარასინს. მაშინ გაუგებრობასთან გვაქვს საქმე. ეს ყველაფერი სამწუხაროდ, ძალიან ცუდად წაადგება საქართველო-რუსეთის მომავალ ურთიერთობას,"- განაცხადა დავით საგანელიძემ.
აღნიშნულ საკითხს ტერიტოიული მთლიანობის აღდგენის საკითხებზე მომუშავე დროებითი საპარლამენტო კომისიის თავმჯდომარე გია ვოლსკიც გამოეხმაურა და განმარტა, რომ ოკუპირებული ცხინვალის რეგიონის მოსაზღვრე ტერიტორიებზე განვითარებული მოვლენების შესახებ ინფორმაცია საერთაშორისო სასზოგადოებას უნდა მიეწოდოს.
"სწორედ ახლა, როდესაც მოლაპარაკებები მიმდინარეობს, რასაკვირველია ეს არის გაუგონარი ყველა თვალსაზრისით - პოლიტიკური თვალსაზრისით, ჰუმანიტარული თვალსაზრისით და მე ვფიქრობ, ამ საკითხთან დაკავშირებით საგანგებო განცხადება უნდა გაკეთდს როგორც გაერო-ს გენერალურ ასამბლეაზე, ასევე იმ ფორმატებში, რომელიც მოლაპარაკებებისთვის არის განსაზღვრული,"- განაცხადა გია ვოლსკიმ.
ცნობისთვის, 22 სექტემბერს ოკუპირებული ცხინვალის რეგიონის მოსაზღვრე სოფელ დვანთან რუსმა სამხედროებმა სადემარკაციო სამუშაოები განაახლეს. საოკუპაციო ზოლის 400 - 500 მეტრით გადმოწევის შედეგად, საქართვლოს ხელისუფლების მიერ არაკონტროლირებად ტერიტორიაზე 10 ჰექტარამდე მიწის ფართობი და მასზე არსებული სახნავ-სათესი მიწები და მოსახლეობის ხეხილის ბაღები მოექცა.
