ხვალ, 23 სექტემბერს, საქართველოს სამდღიანი ვიზიტით, ევროსაბჭოს საპარლამენტო ასამბლეის წინასაარჩევნო დელეგაცია ეწვევა.
წინასაარჩევნო საკითხებთან დაკავშირებით ევროსაბჭოდან თბილისში დეპუტატები მერიქსელ მატეუ პი, ანდრეს ჰერკელი, ჯონ ტომლინსონი, კრისტოფერ ჩოპე, ვასილი ლიხაჩევი და ბორის სილევიჩი ჩამოდიან. ისინი თავდაპირველად საქართველოში ევროსაბჭოს წარმომადგენლობის ხელმძღვანელს კატერინა ბოლონეზეს შეხვდებიან. შემდგომ გაიმართება შეხვედრები სამოქალაქო საზოგადოების წარმომადგენლებთან, მედიასთან, დიპლომატიურ კორპუსთან და ეუთოს სადამკვირვებლო მისიის ხელმძღვანელ მატეო მეკაჩისთან.
დელეგაცია შეხვედრებს 24 სექტემბრიდან გაიმართავს.
24 სექტემბერს ევროსაბჭოს საპარლამენტო დელეგაცია ცენტრალური საარჩევნო კომისიის თავმჯდომარე თამარ ჟვანიას, პრემიერ-მინისტრ ბიძინა ივანიშვილს და პარლამენტის თავმჯდომარე დავით უსუფაშვილს შეხვდება.
25 სექტემბერს კი დაგეგმილია შეხვედრები საპრეზიდენტო კანდიდატებთან: დავით ბაქრაძესთან, ნინო ბურჯანაძესთან, გიორგი მარგველაშვილთან, შალვა ნათელაშვილთან და გიორგი თარგამაძესთან.
დელეგაცია შეხვედრას გამართავს შინაგან საქმეთა სამინისტროში. ასევე, შეხვდებიან უშიშროების საბჭოს მდივან გიგა ბოკერიასა და იუსტიციის მინისტრ თეა წულუკიანს.
ევროსაბჭოს საპარლამენტო ასამბლეის წინასაარჩევნო დელეგაცია ვიზიტის დასასრულს პრესკონფერენციას გამართავს.