სამხრეთ კავკასიაში ამერიკის შეერთებული შტატების სახელმწიფო მდივნის ყოფილი თანაშემწის მეთიუ ბრაიზას განცხადებით, "2012 წლის საპარლამენტო არჩევნებში გამარჯვების შედეგად საქართველოს ხელისუფლებაში მოსულმა ახალმა მთავრობამ ყოფილი მაღალჩინოსნების დაკავებით მმართველობის დასაწყისშივე დააზიანა საკუთარი პოზციები".
მეთიუ ბრაიზასთან ვრცელი ინტერვიუ, სადაც იგი საქართველოს შიდა და საგარეო პოლიტიკურ საკითხებზე, ასევე, ქვეყანაში მიმდინარე დემოკრაიულ პროცესებსა და ახალი და ძველი ხელისუფლებების მიღწევებისა თუ შეცდომების შესახებ საუბრობს, "ამერიკის ხმის" ვაშინგტონის ბიურომ ტელეკომპანია "იმედის" დაკვეთით ჩაწერა.
"უკანასკნელ პერიოდში საქართველოს შიდა პოლიტიკაზე ისეთ ყურადღებას ვეღარ ვამახვილებ, მაგრამ როგორც დამკვირვებელი, შემიძლია ის ვთქვა, რომ საქართველოს მთავრობამ საკუთარი პოზიციები დააზიანა მმართველობის დასაწყისში, როცა შექმნა პოლიტიკური დაპატიმრებების შთაბეჭდილება. საქართველოში მეგობრებთან საუბრისას ხშირად მესმის, რომ ეს არ არის პოლიტიკურად მოტივირებული დაკავებები და დანაშაული ნამდვილად იყო ჩადენილი. ძალიან კარგი. მაშინ, ჩაატარეთ გამოძიება. ვაშინგტონში ვიცით რა ხდება. ხალხს ჰგონია, რომ საქართველოში დემოკრატია არ ვითარდება სწორედ ამ პოლიტიკურად მოტივირებული დაპატიმრებების გამო. მე არ მგონია, რომ ისინი პოლიტიკური დაპატიმრებებია,"- განაცხადა მეთიუ ბრაიზამ.
