ქვეყნის სოციალური და ეკონომიკური განვითარების სტრატეგიაში ტურიზმის თემის არ არსებობას, ტურიზმის ეროვნული ადმინისტრაციის ხელმძღვანელი ხსნის იმით, რომ ტურიზმის განვითარების სტრატეგია ცალკე დოკუმენტი იქნება. როგორც გიორგი სიგუა განმარტავს, ტურიზმის განვითარების სტრატეგია საკმაოდ მსხვილტანიანი დოკუმენტი იქნება და ამ დოკუმენტით იხელმძრვანელებენ ეხლანდელი თუ შემდგომი მთავრობები.
„საქმე იმაშია, რომ საქართველოს ტურიზმის განვითარების სტრატეგია საერთოდ არ გააჩნია, არც არასოდეს გააჩნდა და არც ეხლაც გააჩნია. ალბად ამისათვის არავის მოუცლია. ამ მიმართულებით, ჩვენ მსოფლიო ბანკთან ვთანამშრომლობთ და დეკემბერში ალბად ტენდერზე გავიტანთ ამ სრატეგიის დაწერას. ეს არ არის 3 ფურცლიანი და 4 ფურცლიანია თავისუფალი თემა, რომელიც თავისუფლად შეიძლება დაწერო. ალბად ეს იქნება ასეულობით გვერდიანი დოკუმენტი, რომელიც იქნება სახელმძღვანელო ყველა მთავრობისათვის. ცალკე იარსებებს ტურიზმის განვითარების დოკუმენტი და ეს არ იქნება თაროზე დასადები დოკუმენტი. ეს იქნება დოკუმენტი, რომლითაც ისარგებლებს ყველა მთავრობა"- განაცხადა ტურიზმის ადმინისტრაციის ხელმძღვანელმა.
აღსანიშნავია, რომ სტატისტიკური ინფორმაციის მიხედვით, ტურიზმის წილი ქვეყნის მშპ-ში მზრდადია. 2013 წლის მეორე კვარტლის მონაცემებით, ტურიზმის წილმა მშპ-ში 7,3 %-ი შეადგინა, მაშინ როდესაც 2013 წლის პირველ კვარტალში ქვეყნის მშპ-ში ტურიზმის წილი 6,17 %-ს შეადგენდა.
აღსანიშნავია, რომ 2007 წელს ტურიზმის წილმა მშპ-ში 6,85 %-ი შეადგინა, 2008 წელს - 6,24 %-ი, 2009 წელს - 5,83 %-ი, 2010 წელს - 6,08 %-ი, 2011 წელი - 6,3 %-ი და 2012 წელი კი 6.37 %-ი.
შეგახსენებთ, რომ ქვეყნის სოცალური და ეკონომიკური განვითარების პირველადი პრეზენტაცია რამდენიმე დღის უკან მოხდა. 18 სექტემბერს დოკუმენტის ძირითად მიმართულებებზე ექსპერტებმა და მთავრობის ეკონომიკურმა გუნდმა პრემიერ-მინისტრთან ერთად იმსჯელა.
