კომუნიკაციების ეროვნული კომისიის საქმიანობის შემსწავლელი დროებითი საგამოძიებო კომისიის საჯარო სხდომაზე ტელეკომპანია „ობიექტივის" საქმე განიხილეს. კომისიის სხდომაზე „ობიექტივის" ჟურნალისტმა ირმა ინაშვილი ტელეკომპანიის ირგვლივ განვითარებულ მოვლენებზე ისაუბრა. მისი თქმით, „ობიექტივი" სააკაშვილის რეჟიმის მსხვერპლი გახდა.
„ჩვენ დღეს საგამოძიებო კომისიას მივაწოდეთ დეტალური ინფორმაცია. ეს ინფორმაცია ისედაც იყო გასაჯაროებული, მაგრამ უფრო დეტალიზაცია მოხდა, იმედი მაქვს რომ კომისია იმუშავებს კომპეტენტურად. არ მაქვს მოლოდინი, რომ მაინც და მაინც დაგვიბრუნებენ ამ ლიცენზიას, მაგრამ არ მეწყინებოდა თუ სხვა ლიცენზიას მოგვცემენ" - აცხადებს ინაშვილი.
„ობიექტივის" ჟურნალისტი იმ სქემაზე საუბრობს თუ როგორ დაკარგა ტელევიზიამ ლიცენზია.
„2004 წლიდან დაიწყო ზეწოლა ტელეკომპანია „ობიექტივის" მფლობელებზე. დიმიტრი ქიტოშვილმა მაშინ პირდაპირ დაიბარა ტელეკომპანიის დირექტორი მიხეილ აგლაძე კაბინეტში და უთხრა რომ მას წილი დაეთმო. წინააღმდეგ შემთხვევაში შეუქმნიდა ბევრ პრობლემას. ჩვენ რა თქმა უნდა მაშინ გაგვეცინა რადგან ვერ წარმოვიდგენდით თუ ასე წაართმევდნენ ტელეარხებს ლიცენზიებს. დაიწყო პერმამენტული ზეწოლა, მუქარა ჩვენს თანამშრომლებზე, ჩვენი დირექტორი სასტიკად ცემეს. ბოლოს ტელევიზიის წილის 50 % გადაიფორმა დავით კაკაურიძემ, შემდეგ მან აჩუქა ჭარხალაშვილს, ჭარხალაშვილმა აჩუქა კვირიკაშვილს და კვირიკაშვილმა აჩუქა სახელმწიფოს" - აცხადებს ინაშვილი.
კომისიის ხელმძღვანელის თინა ხიდაშელის განცხადებით, „ობიექტივის" ისტორია სრულიად ასახავს იმ რეალობას რაც წინა ხელისუფლების დროს მედია სივრცეში ხდებოდა.
„თავისთავად ამბავი იმის შესახებ, რომ მართალს ამბობს ობიექტივი თუ არა ძალიან მარტივი დოკუმენტით დასტურდება. როდესაც 2008 წლის 8 თებერვალს დირექტორი მარეგულირებელ კომისიას მიმართვს და ეუბნება რომ მას არ უნდა სიხშირე რომელსაც ფლობს და საერთოდ აღარ აპირებს ჰქონდეს ტელევიზია და სახელმწიფოს უბრუნებს სიხშირეს. ამ პირობებში 20 თებერვლს ახალი მესაკუთრე ჩნდება. მარტივი კითხვა უნდა დაგვებადოს, რა ინტერესი ჰქონდა ამ ბატონ კვირიკაშვილს ეყიდა ტელევიზია, რომელიც უკვე ფაქტიურად აღარ არსებობდა" - აცხადებს ხიდაშელი.
შეგახსენებთ, რომ კომისიაში ტელეკომპანია „ობიექტივის" საკითხის განხილვა ორი დღა მიმდინარეობს.