"დიცში მომხდარი ფაქტის გამო, ამ მიმართულებით ყველა საერთაშორისო მექანიზმი აქტიურად იქნება გამოყენებული,"- ამის შესახებ საქართველოს უმაღლესი საკანონმდებლო ორგანოს თავმჯდომარის მოადგილემ ზურაბ აბაშიძემ რუსი სამხედროების მიერ ოკუპირებული ცხინვალის რეგიონის მოსაზღვრე სოფელ დიცში ე.წ. საზღვრის გავლების პროცესის და მავთულხლართების გავლების ფაქტის კმენტირებისას ისაუბრა.
"მთავარია, რომ საერთაშორისო თანამეგობრობის მიმართ ძალიან სერიოზული განცხადებებია გაკეთებული. ეს არის ყველაზე პრინციპული. ევროკავშირის სადამკვირვებლო მისია აქტიურად არის ამ პროცესში ჩართული და დარწმუნებული ვარ, ევროკავშირის წევრი ქვეყნებიც აქტიურად არიან ამ პროცესში ჩართული. თავად ის კარგი ფაქტია, რომ ეუთო-ს საპარლამენტო ასამბლეის პრეზიდენტი ბატონი კრივოკაპიჩი ბრძანდება საქართველოში და თვითონ გაეცნობა არსებულ ვითარებას. ამ მიმართულებით ყველა საერთაშორისო მექანიზმები აქტიურად იქნება გამოყენებული,"- განაცხადა ზურაბ აბაშიძემ.
შეგახსენებთ, რომ გუშინ რუსმა მესაზღვრეებმა საქართველო ოკუპირებული ტერიტორიის მოსაზღვრე სოფელ დიცთან მავთულხლართების გავლების პროცესი განაახლეს. აღნიშნულის გამო, სოფლის მოსახლეობა სასაფლაოს, სარწყავი წყლის და საძოვრების გარეშეა დარჩენილი.
