"რაც შეიძლება მეტი მუშაობაა საჭირო და ვფიქრობ, საბოლოოდ საოკუპაციო ხაზები აღარ იქნება,"- ამის შესახებ საქართველოს უმაღლესი საკანონმდებლო ორგანოს ტერიტორიული მთლიანობის აღდგენის საკითხთა დროებითი კომისიის თავმჯდომარემ გია ვოლსკიმ რუსი სამხედროების მიერ ოკუპირებული ხინვალის რეგიონის მოსაზღვრე სოფელ დიცში ე.წ. საზღვრის გავლების პროცესის და მავთულხლართების გავლების ფაქტის კმენტირებისას ისაუბრა.
"ეს ოკუპაციის ერთ-ერთი გამოხატულებაა, რომ ავლებენ საოკუპაციო ხაზებს და ღობეებით და მავთულხლართებით აფიქსირებენ. რასაკვირველია, მოსახლეობაც განიცდის ამას. მე არ ვფიქრობ, რომ საზოგადოება იქით მხარეს ამით არის გახარებული, ვინაიდან, რამდენიმე ოსური ოჯახიც სერიოზულად დაზარალდა. მიყვებიან იმ ხაზს, რომელის ე.წ. ავტონომიური ოლქის საზღვარს აფიქსირებდა საბჭოთა პერიოდში. მუშაობაა საჭირო, რაც შეიძლება მეტი, ინტენსიური და ვფიქრობ, საბოლოოდ ეს ხაზები აღარ იქნება,"- განაცხადა გია ვოლსკიმ.
შეგახსენებთ, რომ გუშინ რუსმა მესაზღვრეებმა საქართველო ოკუპირებული ტერიტორიის მოსაზღვრე სოფელ დიცთან მავთულხლართების გავლების პროცესი განაახლეს. აღნიშნულის გამო, სოფლის მოსახლეობა სასაფლაოს, სარწყავი წყლის და საძოვრების გარეშეა დარჩენილი.
