მავთულხლართები საქართველოში არ იქნება, მე დავამკვიდრებ სამართლიანობას ყველგან და ყველასთვის. ამის შესახებ საპრეზიდენტო კანდიდატმა ნინო ბურჯანაძემ თეთრიწყაროს რაიონის მოსახლეობასთან შეხვედრისას განაცხადა.
პარტის პრესსამსახურის ინფორმაციით, „დემოკრატიული მოძრაობის" ლიდერმა მოსახლეობის პრობლემები მოისმინა. როგორც შეხვედრის შემდეგ ქალბატონმა ნინო ბურჯანაძემ ჟურნალისტებთან განაცხადა:
„ნებისმიერ ამ ადამიანთან რომ შეხვიდეთ სახლში, უკიდურეს გაჭირვებას დაინახავთ, მაგრამ დამეთანხმებით ალბათ, რომ არცერთ მათგანს თავიანთ გაჭირვებაზე საკითხი არ დაუყენებია. ყველა მათგანმა ისაუბრა სამაჩაბლოს პრობლემაზე, კოდორის პრობლემაზე და საქართველოს მთლიანობის პრობლემაზე. ეს ყველაზე დიდი ტკივილია და რა თქმა უნდა, ის ადამიანები, რომლებმაც ეს ხალხი დევნილებად აქცია საკუთარ მიწა-წყალზე, უპირველეს ყოვლისა სააკაშვილი და მისი უტვინო პოლიტიკის მიმდევრები მყავს მხედველობაში, უნდა წარსგდნენ მართლმსაჯულების წინაშე. მე ამ ადამიანებს ვპირდები, რომ სამართლიანობა აღდგება ყველგან და ყველასთვის, რაც უპირველეს ყოვლისა ნიშნავს მათი მიწა-წყალზე, ძირძველ ადგილებზე დაბრუნებას, ნიშნავს იმას, რომ მავთულხლართები საქართველოში აღარ იქნება. მე მთელ საქართველოს ვეუბნები იმას, რომ საქართველოში დევნილები უნდა დაბრუნდნენ საკუთარი სამშობლოს იმ ნაწილში, საიდანაც ისინი არიან. მე ყველაფერს გავაკეთებ იმისათვის, რომ აღსდგეს ჩატეხილი ხიდები აფხაზებთან და ოსებთან. მე ყველაფერს გავაკეთებ იმისათვის, რომ საქართველოს გამთლიანების პროცესი დაიწყოს. მე ვპირდები დევნილებს, რომ დავაბრუნებ მათ მიწა-წყალზე. მე ვპირდები სამეგრელოს, რომ სამეგრელო და ზუგდიდი ჩიხი აღარ იქნება. მე ვპირდები კახელ გლეხს, რომ ომი აღარ იქნება და გლეხები თავისი შრომის საფასურს მიიღებენ. მე ნამდვილად ვიცი ამ ადამიანების პრობლემები, ვიცი, როგორ უნდა მოვუარო მათ და გავაკეთებ ყველაფერს იმისათვის, რომ სამართლიანობა ქვეყანაში აღსდგეს, მე დავამკვიდრებ სამართლიანობას ყველგან და ყველასთვის."
მასალის გამოყენების პირობები
