საპარლამენტო უმცირესობის წევრის აკაკი მინაშვილის განცხადებით, "საქართველოს დღევანდელი ხელისუფლების მიერ რუსეთის მიმართ განხორციელებულმა დაყვავების პოლიტიკამ ნეგატიური შედეგები გამოიღო".
როგორც მინაშვილმა "ნაციონალური მოძრაობის" ცენტრალურ ოფისში დღეს გამართულ ბრიფინგზე აღნიშნა, "რუსეთის ფედერაციის ქმედებები და კერძოდ, ოკუპირებული ცხინვალის რეგიონთან ე.წ. საზღვრის დაკანონების შესახებ დოკუმენტის შედგენა ინტენსიური აგრესიის გაგრძელებაა".
"რუსეთის მიმართ ე.წ. დათბობის და დაყვავების პოლიტიკა, რომელიც სამწუხაროდ, საქართველოს დღევანდელ ხელისუფლებას აქვს, ძალიან ნეგატიური შედეგები მოაქვს და ჩვენ ვხედავთ რომ მიუხედავად "სიყვარულისა", რომელსაც ბიძინა ივანიშვილის მთავრობა რუსეთის მიმართ გამოხატავს, რუსეთი აგრძელებს თავის აგრესიას და ოკუპაციას საქართველოს ტერიტორიაზე. ეს არის ასე ვთქვათ, სირაქლემას პოზიცია, როდესაც ძალიან ინტენსიურად ხდება აგრესიის გაგრძელება საქართველოს წინააღმდეგ, ამ დროს კი, ბატონი აბაშიძე გამოდის და საუბრობს იმაზე, რომ თურმე ჩვენ უნდა ვისაუბროთ კულტურულ ურთიერთობებზე და სხვა ტიპის ურთიერთობებზე, მაშინ როდესაც ადამიანების და სახლმწიფოს ბედი წყდება ამ პერიოდში,"- განაცხადა აკაკი მინაშვილმა.
ცნობისთვის, რუსული მედიის ცნობით, რუსეთის ფედერაციის პრეზიდენტმა ვლადიმერ პუტინმა ქვეყნის საგარეო საქმეთა სამინისტროს დაავალა, მომზადდეს ოფიციალური ხელშეკრულება "სამხრეთ ოსეთთან სახელმწიფო საზღვრის შესახებ".
"დაევალოს რუსეთის საგარეო საქმეთა სამინისტროს, გამართოს მოლაპარაკებები სამხრეთ ოსეთის მხარესთან და მოლაპარაკებების შედეგად რუსეთის ფედერაციის სახელით ხელი მოაწეროს ხელშეკრულებას", - ნათქვამია დოკუმენტში.
არსებული ინფორმაციით, აღნიშნული შეთანხმებით განისაზღვრება სახელმწიფო საზღვრის ზოლი რუსეთსა და ე.წ. სამხრეთ ოსეთს შორის. როგორც რუსეთის მთავრობის პრესსამსახურში განმარტავენ, ამ ხელშეკრულების გაფორმება "ხელს შეუწყობს რუსეთის ფედერაციის სახელმწიფო საზღვრის საერთაშორისო-სამართლებრივ გაფორმებას და სასაზღვრო რეჟიმის გაძლიერების განხორციელებას".
