საქართველოს ხელისუფლება, ოპოზიცია და სამოქალაქო საზოგადოება შეთანხმდნენ ცენტრალური საარჩევნო კომისიის თავმჯდომარის კანდიდატურაზე.
პრემიერ-მინისტრი ბიძინა ივანიშვილი მიესალმება საქართველოს ცენტრალური საარჩევნო კომისიის 11 სექტემბრის გადაწყვეტილებას ცენტრალური საარჩევნო კომისიის ახალ თავმჯდომარედ თამარ ჟვანიას დანიშვნასთან დაკავშირებით. როგორც პრემიერ-მინისტრმა აღნიშნა, თამარ ჟვანია, რომელიც იყო გაეროს საარჩევნო პროგრამების კოორდინატორი და რომელსაც მხარს უჭერს ყველა პოლიტიკური ძალა და სამოქალაქო საზოგადოების ფართო წარმომადგენლობა, იქნება გარანტი იმისა, რომ ოქტომბერში პრეზიდენტის არჩევნები ჩატარდება თავისუფალ და სამართლიან გარემოში.
„თამარ ჟვანია არის კანდიდატურა, რომელსაც მხარს უჭერენ წამყვანი პოლიტიკური პარტიები და სამოქალაქო საზოგადოება", - განაცხადა ივანიშვილმა. „მჯერა, რომ ის გამოიყენებს თავის გამოცდილებას იმისათვის, რომ ცენტრალურმა საარჩევნო კომისიამ უზრუნველყოს 27 ოქტომბრის საპრეზიდენტო არჩევნების ჩატარება თავისუფალ და სამართლიან გარემოში."
პრეზიდენტმა სააკაშვილმა ორ სხვა კანდიდატთან ერთად წარადგინა თამარ ჟვანიას კანდიდატურა, რომელსაც ერთხმად გაუწიეს რეკომენდაცია სამოქალაქო საზოგადოების წამყვანმა ორგანიზაციებმა. მისასალმებელია, რომ ხელისუფლების, ოპოზიციური პარტიებისა და წამყვანი სამოქალაქო საზოგადოების შეთანხმების შედეგად ცენტრალურმა საარჩევნო კომისიამ დაამტკიცა თამარ ჟვანიას კანდიდატურა.
თამარ ჟვანია იყო ადგილობრივი სადამკვირვებლო ორგანიზაცია ,,სამართლიანი არჩევნებისა და დემოკრატიის საერთაშორისო საზოგადოების" (ISFED) აღმასრულებელი დირექტორი. 2007 წელს მან მუშაობა დაიწყო თბილისში გაეროს განვითარების პროგრამაში, რომელიც ითვალისწინებს საარჩევნო დახმარების უზრუნველყოფას. საზოგადოებისთვის ცნობილია, რომ არჩევნების წინ, ორი თვით ადრე ზურაბ ხარატიშვილი გადადგა ცესკოს თავმჯდომარის თანამდებობიდან.
