"არც ერთბაშად რუსეთში დაბრუნება და არც ნაბიჯ-ნაბიჯ რუსეთისკენ სვლა არ შეიძლება იყოს ღირსეული მომავალი ჩვენი ქვეყნისთვის და ჩვენი შვილებისთვის. თავისუფლება და ევროპული მომავალი მიიღწევა არა დათმობებით, არამედ პრინციპულობით, საკუთარი ინტერესების დაცვით,"- ამის შესახებ "ნაციონალური მოძრაობის" საპრეზიდენო კანდიდატმა დავით ბაქრაძემ ზუგდიდში მხარდამჭერებთან დღეს გამართულ შეხვედრაზე ისაუბრა.
ბაქრაძის თქმით, მას რუსეთთან ურთიერთობის კუთხით დიდი პოლიტიკური გამოცდილება აქვს და საქართველოს ტერიტორიიდან რუსული სამხედრო ბაზების გაყვანის ტაობაზე მოლაპარაკებებშიც უშუალოდ მონაწილეობდა, რითაც იგი ამაყობს.
ამასთან, ბაქრაძემ მისი კონკურენტი პრეზიდენტობის კანდიდატების პოლიტიკური ხედვებიც შეაფასა და აღნიშნა, რომ "დღეს ზოგიერთ კანდიდატს, რომელიც პრეზიდენტობისკენ მიილტვის, აქვს გამოდილება, მაგრამ ეს არის ოკუპანტთან კარზე ხლების, თავის დახრის და დამორჩილების გამოცდილება. ხოლო გამოუცდელობა, რომელიც მრავალი სხვა კანდიდატის დამახასიათებელი თვისებაა, არანაკლებ საშიშია, ვინაიდან ნაბიჯ-ნაბიჯ გვაბრუნებს რუსეთთან".
"მე მინდა რუსეთთან ურთიერთობის დარეგულირება, მაგრამ ცალსახად ვაცხადებ, რომ ეს ურთიერთობის აღდგენა საქართველოს ეროვნული ინტერესების ხარჯზე ვერ მოხდება. რუსეთთან ურთიერთობის გაუმჯობესება კარგია, მაგრამ ეს ურთიერთობები მხოლოდ მაშინ გაუმჯობესდება, თუ რუსეთი მიხვდება, რომ შეუძლებელია საქართველოს დამორჩილება, შეუძლებელია საქართელოს გადაყვანა არჩეული გზიდან. ასე იყო ევროპაში, ასე იყო ლიტვაში, ლატვიაში, პოლონეთში, ჩეხეთში, ესტონეთში და ასე იქნება საქართველოშიც. ამიტომ მე დღეს ვაცხადებ, რა თქმა უნდა კარგია, თუ სრულად გაიხსნება რუსული ბაზარი და იქ დაბრუნდება ჩვენი პროდუქცია, მაგრამ ეს არ მოხდება ჩვენი ეროვნული ინტერესების შელახვის ხარჯზე. გამიხარდება, როდესაც ჩვენი ხილი და ღვინო შევა რუსულ ბაზარზე, მაგრამ ეს არ მოხდება იმის ხარჯზე, რომ როდესმე კითხვის ნიშნის ქვეშ დავაყენოთ ასეულობით ათასი დევნილის უფლება - დაბრუნდეს საკუთარ სახლში, დაბრუნდეს საკუთარ კუთხეში და იცხოვროს საკუთარ სამშობლოში. ვიცი რას ნიშნავს რუსეთთან დიალოგი, წლები გავატარე რუსეთთან მოლაპარაკებაში, მე ვიყავი მონაწილე იმ მოლაპარაკებებისა, რომლის შედეგად, საქართველოდან რუსი მესაზღვრეები გავიდნენ და მე ვამაყობ ამით, ვიყავი მონაწილე მოლაპარაკებების, რომლის თანახმად რუსეთი საქართველოდან სამხედრო ბაზების გაყვანას დათანხმდა და ამით ვამაყობ. ამიტომ მე ვიცი როგორი უნდა იყოს შედეგზე ორიენტირებული დიალოგი რუსეთთან - კონსტრუქციული, მშვიდი, მაგრამ ამავე დროს, პრინციპული, კრიტიკული და ქვეყნის ინტერესებზე ორიენტირებული. ნებისმიერი სხვა ფორმა, თავის დახრა, კრიტიკაზე უარის თქმა, პირფერობა, ყველაფერი ეს საპირისპირო შედეგამდე მიგვიყვანს და ეს მე ძალიან კარგად ვიცი. ევრაზიული კავშირის შესწავლის, ჩვენი მეგობარი სომეთის საგარეო პოლიტიკის მოწონების, რუსეთის ჯაშუშების გათავისუფლების და გმირებად გამოშვების, სამართალდამცავებში შევარდნაძის დროინდელი კადრების დაბრუნების გზით, არც ერთი არ არის ჩვენი გზა,"- განაცხადა დავით ბაქრაძემ.
