არასამთავრობო ორგანიზაცია "სართაშორისო გამჭვირვალობა - საქართველოს" აღმასრულებელი დირექტორი ეკა გიგაური საქართველოს ცენტრალური საარჩევნო კომისიის თავმჯდომარის პოსტზე თამარ ჟვანიას კანდიდატურას უალტერნატივოდ მიიჩნევს.
როგორც გიგაურმა "ჯი-ეიჩ-ენთან" საუბრისას აღნიშნა, ცესკოს- ახალი თავმჯდომარის არჩევის საკითხზე შესაბამისი კომისია დღეს იმსჯელებს და საარჩევნო ადმინისტრაციის უფროსის ვინაობაც სავარაუდოდ, დღესვე გახდება ცნობილი.
მისივე თქმით, "ცესკოს - თავმჯდომარის პოსტზე პრეზიდენტის მიერ თამარ ჟვანიას გარდა წარდგენილი 2 კანდიდატის - მანუჩარ გამყრელიძის და კონსტანტინე ამირეჯიბის დახასიათება უჭირს, რადგან მისთვის უცნობია მათი მოღვაწეობა, თუმცა რადგან პრეზიდენტს კონკრეტულმა არასამთავრობო ორგანიზაციებმა ცესკოს- ხელმძღვანელის პოსტზე წარსადგენად გამყრელიძის და ამირეჯიბის კანდიდატურები შესთავაზეს, ალბათ, ისინი აღნიშნულ სფეროში კომპეტენტური პირები არიან".
"ჩვენი ორგანიზაციების მიერ წარდგენილი კანდიდატი თამარ ჟვანია მისი პიროვნული თვისებებიდან, პროფესინალიზმიდან და საარჩევნო სფეროში სამუშაო გამოცდილებიდან გამომდინარე, ვფიქრობთ, რომ უალტერნატივო კანდიდატურაა. მიგვაცნია, რომ ის უნდა გახდეს ცესკო-ს თავმჯდომარე. როგორც ვიცი, კომისია ამ საკითხზე დღეს მსჯელობს და საბოლოო გადაწყვეტილებაც ალბათ დღესვე გახდება ცნობილი. რაც შეეხება ჟვანიას გარდა დასახელებულ კიდევ ორ კანდიდატს, მე მათ პირადად არ ვიცნობ, არ ვიცი მათი მოღვაწეობის შესახებ და თუ თამარ ჟვანიას ნაცვლად რომელიმე მათგანი იქნა არჩეული, ამის წინასწარ შეფასებებები გამიჭირდება,"- განაცხადა ეკა გიგაურმა.
ცნობისთვის, საქართველოს პრეზიდენტმა, მიხეილ სააკაშვილმა ცენტრალური საარჩევნო კომისიის თავმჯდომარის თანამდებობაზე 9 სექტემბერს სხვადასხვა არასამთავრობო ორგანიზაციების მიერ შერჩეული სამი კანდიდატურა - გაეროს განვითარების პროგრამის საარჩევნო პროექტის მენეჯერი
თამარ ჟვანია და საარჩევნო ადმინისტრაციის ორი მოქმედი თანამშრომელი - მანუჩარ გამყრელიძე და კონსტანტინე ამირეჯიბი წარმოადგინა.
საქართველოს ცენტრალური საარჩევნო კომისიის ახალი თავმჯდომარის ვინაობა სავარაუდოდ, დღეს გახდება ცნობილი. კოალიცია "ქართული ოცნების" წარმომადგენლებმა ცესკო-ს თავმდომარის პოსტზე წარდგენილი სამი კანდიდატიდან საარჩევნო ადმინისტრაციის ხელმძღვანელის პოსზტზე თამარ ჟვანიას, მანუჩარ გამყრელიძის და კონსტანტინე ამირეჯიბის კანდიდატურებს შორის უნდა გააკეთონ არჩევანი.
