საგარეო საქმეთა სამინისტროს ინფორმაციით, ქართული მხრიდან შეხვედრას ხელმძღვანელობდა საგარეო საქმეთა მინისტრის მოადგილე თამარ ბერუჩაშვილი; ხოლო ევროკავშირის მხრიდან - ევროკომისიის საშინაო საქმეთა გენერალური დირექტორატის ხელმძღვანელი (გენერალური დირექტორი) სტეფანო მანსერვისი.

შეხვედრაზე განხილულ იქნა საქართველო-ევროკავშირის სავიზო რეჟიმის ლიბერალიზაციის სამოქმედო გეგმის შესრულების კუთხით განხორციელებული პროგრესი და შემდგომი ნაბიჯები.

ევროკომისიის მხრიდან გამოითქვა მზადყოფნა, „აღმოსავლეთ პარტნიორობის" სამიტამდე, 2013 წლის ოქტომბრის შუა რიცხვებში საქართველოში განხორციელდეს ევროკავშირის ექსპერტთა მისია ქვეყნის მიერ სავიზო რეჟიმის ლიბერალიზაციის სამოქმედო გეგმის განხორციელების შეფასების მიზნით.

აღნიშნული ვიზიტის ფარგლებში, ასევე, შედგა თამარ ბერუჩაშვილის შეხვედრები ევროკავშირის საგარეო ქმედებათა სამსახურის გენერალური მდივნის მოადგილესთან ჰელგა შმიდთან, ევროპული საგარეო ქმედებათა სამსახურის (EEAS) რუსეთის, აღმოსავლეთ პარტნიორობის, ცენტრალური აზიის, რეგიონული თანამშრომლობისა და ეუთო-ს სამმართველოს დირექტორატის ხელმძღვანელთან გუნარ ვიგანდსა და ევროკომისიის ვაჭრობის გენერალური დირექტორის მოადგილესთან პიტერ ბალაშთან. შეხვედრებზე მხარეებმა ისაუბრეს საქართველო-ევროკავშირის თანამშრომლობის მიმდინარე პრიორიტეტებზე, მათ შორის განსაკუთრებული აქცენტი გაკეთდა 2013 წლის ნოემბერში „აღმოსავლეთ პარტნიორობის" ვილნიუსის სამიტისთვის არსებულ გეგმებსა და სამიტის შემდგომ თანამშრომლობის პერსპექტივებზე.

შეხვედრებზე, ასევე, ყურადღება გამახვილდა საქართველოში უსაფრთხოების კუთხით არსებულ მდგომარეობაზე და ევროკავშირის როლის გააქტიურების მნიშვნელობაზე ქვეყანაში სტაბილურობის ხელშეწყობის მიმართულებით. ევროკავშირის წარმომადგენლების მხრიდან ხაზი გაესვა ევროკავშირის მხარდაჭერას „აღმოსავლეთ პარტნიორობის" ვილნიუსის სამიტისთვის საქართველოს მიერ დასახული მიზნების განხორციელების პროცესში, მათ შორის განსაკუთრებით ასოცირების შესახებ შეთანხმების პარაფირების თვალსაზრისით.