"პრემიერ-მინისტრმა ბევრჯერ გვთხოვა, რომ მის ამ უმნიშვნელოვანეს გადაწყვეტილებაში გვერდში დავუდგეთ,"- ამის შესახებ საქართველოს იუსტიციის მინისტრმა თეა წულუკიანმა პრემიერ-მინისტრ ბიძინა ივანიშვილის მიერ პოლიტიკიდან უახლოეს მომავალში შესაძლო წასვლის თაობაზე გაკეთებული განცხადების კომენტირებისას ისაუბრა.
წულუკიანის თქმით, მისთვის ჯერ-ჯერობით უცნობია დარჩება თუ არა ბიძინა ივანიშვილის შემცვლელი პრემიერის გუნდში, რადგან ამისათვის ორი პირობა არსებობს, ერთი ის, რომ თავად ივანიშვილის შემცვლელმა მოისურვოს წულუკიანთან თანამშრომლობის გაგრძელება და მეორე ის, რომ თეა წულუკიანს ჰქონდეს ახალ პრემიერ მინისტრთან მუშაობის სურვილი.
"მე ბევრჯერ ვთქვი, რომ პირადად ჩემი სურვილი იქნებოდა, რომ ის მას შემდეგ წასულიყო, რაც ქვეყანაში და სახელმწიფოში შიგნით ყველაფერი დალაგდებოდა. როგორც ჩანს, ის ამას იზიარებს, მაგრამ მაინც ძალიან მალე აპირებს, რომ მე ვიტყოდი, ერთ-ერთ ყველაზე სუსტ წერტილში გადაინაცვლოს, რასაც სამოქალაქო საზოგადოება ჰქვია დღეს საქართველოში და ამით დაეხმაროს სახელმწიფოს რეალურად დემოკრატიულ სტრუქტურად ჩამოყალიბებას. მომავალი გუნდი იქნება კოალიციური რეჟიმის. მე ამის მჯერა და მწამს, იმიტომ, რომ არაერთხელ აღინიშნა, ჩვენ 6 პარტია გავერთიანდით მომავალ საპარლამენტო არჩევნებამდე. ვერავინ ალბათ, ვერ მისცემს თავს იმის უფლებას, რომ კოალიციურ რეჟიმში არ გააგრძელოს მუშაობა იმ პროგრამის შესასრულებლად, რომელიც ჩვენ წინასაარჩევნო პერიოდში შევთავაზეთ ქართველ ამომრჩეველს. ჩემთვის მომავალი პრემიერ-მინისტრის გუნდში დარჩენისთვის არის ორი პირობა. ერთი ის, რომ მას თავად აინტერესებდეს ვინც იქნება ჩემთან მუშაობა, რის გარეშეც რა თქმა უნდა ჩვენი თანამშრომლობა ვერ შედგება და მეორე უკვე არის ჩემი ინტერესი, რომ ვიმუშაო იმ პრემიერ-მინისტრთან, ვინც იქნება ბიძინა ივანიშვილის შემცვლელი",- განაცხადა თეა წულუკიანმა.
ამასთან, წულუკიანისვე თქმით, პრემიერ-მინისტრთან მის შემცვლელზე კონსულტაციები ალბათ მიმდინარეობს, თუმცა იუსტიციის მინისტრისთვის ივანიშვილის შემცვლელის ვინაობა ცნობილი არ არის.
