,,ნაციონალური მოძრაობის" საპრეზიდენტო კანდიდატი დავით ბაქრაძე პრემიერ-მინისტრის ბიძინა ივანიშვილის განცხადებას მისი თანამდებობიდან წასვლის შესახებ გამოეხმაურა.
ბაქრაძის განმარტებით, პრემიერ-მინისტრის განცხადება ქვეყნისთვის სერიოზულ რისკებს შეიცავს და არასტაბილურობის განცდის გაღვივებას უწყობს ხელს.
,, პრემიერ-მინისტრის ამ ტიპის განცხადება წარმოადგენს სერიოზულ საფრთხეს ქართული ეკონომიკისთვის, რომელიც ისედაც ღრმა კრიზისის მდგომარეობაშია. ის აძლიერებს არსტაბილურობის განცდას ნებისმიერი უცხოელი ინვესტორისთვის, ან ქართველი ბიზნესმენისთვის, რომელიც გეგმავს ამ ქვეყანაში ბიზნესის დაწყებას. ასეთი განცხადება ნიშნავს რამდენიმეთვიან გაურკვევლობას და ნიშნავს იმას რომ, მინიმუმ, რამდენიმე თვე იქამდე სანამ არ გაირკვევა როდის მიდის პრემიერი და ვინ რჩება მის მაგივრად და რა სიტუაციაა ქვეყანაში თავი უნდა შეიკავოს ბიზნესის გაფართოებისგან. ამიტომ ასეთი განცხადება ეკონომიკისთვის პირდაპირი კრიზისის გაგრძელებაა", _განაცხადა ბაქრაძემ.
მისივე განმარტებით, ბიძინა ივანიშვილის პოლიტიკიდან წასვლა საფრთხეს უქმნის იმ ასევე დაპირებებს, რომელიც კოალიცია ,,ქართულმა ოცნებამ" წინასაარჩევნოდ გააჟღერა. როგორც ჟურნალისტებთან დავით ბაქრაძემ განმარტა არსებობს შესაძლებლობა, რომ ივანიშვილის პოლიტიკიდან წასვლის შემდეგ ხელისუფლებაში გადაწყვეტილების მიღების დეფიციტის საფრთხე გაჩნდეს.
,, ქვეყანა დგას სერიოზული საგარეო გამოწვევების წინაშე. ნუ დაგვავიწყდება, რომ გრძელდება მცოცავი ოკუპაცია რუსეთის მიერ, ჩვენი ორი რეგიონი ოკუპირებულია, ნუ დაგვავიწყდება, რომ სირიის კრიზისს შეიძლება ჰქონდეს ნეგატიური გავლენა რეგიონსა და ქვეყანაზე, ნუ დაგვავიწყდება, რომ ქვეყანაში არსებობს შიდა სტაბილურობის პრობლემა, რადგან კოალიციაში შემავალ პარტიებს გააჩნიათ ძირეულად განსხვავებული ხედვა მთელ რიგ საკითხებთან დაკავშირებით. ამ ყველაფრის გარანტორი გახლავთ ლეგიტიმურად, მაღალი მხარდაჭერით არჩეული პრემიერ-მინისტრი. მისი წასვლის შემთხვევაში ვფიქრობ, რომ ქვეყანაში გადაწყვეტილების მირების დეფიციტი შეიქმნება, რაც უარყოფითად აისახება ქვეყანაზე და ქაოსის განცდას გააძლიერებს", _განაცხადა ბაქრაძემ.
შეგახსენებთ, რომ ბიძინა ივანიშვილმა 12 გვერდიანი განცხადება გაავრცელა, სადაც მისი პოლიტიკიდან წასვლის აუცილებლობაზე საუბრობს. პრემიერ-მინისტრი განმარტავს, რომ ის პოლიტიკიდან საპრეზიდენტო არჩევნების შემდეგ წავა, თუმცა საჭიროების შემთხვევაში აქტიურ პოლიტიკაში კვლავ დაბრუნდება. ივანიშვილი მის შემცვლელზეც საუბრობს, მის ვინაობას არ ასახელებს, მაგრამ აღნიშნავს, რომ ახალი პრემიერ-მინისტრი ყველა საქმის კეთებას შეძლებს.