"პრემიერი ძლიერ მთვარობას და ევროპული ტიპის პრეზიდენტს გიორგი მარგვლაშვილს დატოვებს,"- ამის შესახებ საქართველოს უმაღლესი საკანონმდებლო ორგანოს თავმჯდომარის მოადგილემ მანანა კობახიძემ პრემიერ-მინისტრ ბიძინა ივანიშვილის მიერ პოლიტიკიდან მისი შესაძლო წასვლის თაობაზე გავრცელებული ღია წერილის კომენტირებისას ისაუბრა.
კობახიძის თქმით, "ივანიშვილის ამ გადაწყვეტილებაში საგანგაშო არაფერია, რადგან ის სამოქალაქო საზოგადოებაში გადაინაცვლებს და მის მიერ დატოვებულ ძლიერ და არაკორუმპირებულ მთავრობას გაცილებით ეფექტურად გააკონტროლებს".
"პრემიერ-მინისტრმა დეტალურად აღწერა ის მიზეზები, რატომაც ის გეგმავს პოლიტიკიდან წასვლას. ეს რა თქმა უნდა მოულოდნელი არ იყო, მაგრამ ამაში საზოგადოებამ ნადვილად არ უნდა დაინახოს რაიმე საშიშროება. მინდა გითხრათ, რომ ბიძინა ივაიშვილი არსად არ მიდის. ის რჩება ქვეყანაში, ის არის პატრიოტი ადამიანი. ის ფიქრობს, რომ საზოგადოებას გააძლიერებს მისი მისი გადასვლა სამოქალაქო სექტორში და ძალიან ბევრს გააკეთებს სწორედ იმ კონტროლის გაძლიერებით, რომელიც უკვე საზოგადოების მხრიდან იქნება. ის დატოვებს ძალიან ძლიერ მთავრობას, პრეზიდენტს ბატონ გიორგი მარგველაშვილს, რომელიც ევროპული ტიპის მმართველია და არ არის მიდრეკილი ავტორიტარიზმისკენ. დატოვებს ასევე არაკორუმპირებულ მთავრობას, რომელიც იქნება ყველაზე ეფექტური და ხალხზე ორიენტირებული და უკვე ამ შემადგენლობით რა თქმა უნდა ქვეყანა დაიწყებს იმ აღმშენებლობას, რომელიც წინასაარჩევნოდ კოალიცია "ქართულმა ოცნებამ" დაპირების სახით მისცა საზოგადოებას, ხოლო ბიძინა ივანიშვილი იქნება საზოგადოების სახით კონტროლი, საზოგადოების წევრი და განსაკუთრებით ახალგაზრდებთან აპირებს ის გააქტიურებას და მუშაობას და ვფიქრობ, ამაში არაფერი საშიში არ არის ჩვენი ქვეყნისთვის. პირიქით, ვფიქრობ, რომ ბიძინა ივანიშვილის უკვე საზოგადოებაში გააქტიურება სამოქალაქო საზოგადოების განვითარებას გამოიწვევს, რაც ყველაზე მნიშვნელოვანია საქართველოში,"- განაცხადა მანანა კობახიძემ.
შეგახსენებთ, რომ დღეს საქართველოს პრემიერ-მინისტმა ბიძინა ივანიშვილმა ქართულ საზოგადოებას ღია წერილით მიმართა, სადაც იგი პოლიტიკიდან მის შესაძლო წასვლაზე და ქვეყნის პოლიტიკური ცხოვრების შემდგომ გაგრძელების სავარაუდო სურათზე საუბრობს.
