რუსეთის ფედერაციასთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძის განცხადებით, მისი და რუსეთის საგარეო საქმეთა მინისტრის მოადგილის გრიგორი კარასინის მორიგი შეხვედრა პრაღაში, სავარაუდოდ, სექტემბრის მეორე ნახევარში შედგება.
მისი თქმით, ამ შეხვედრის მთავარი თემა ორ ქვეყანას შორის სტრანსპორტო კავშირების აღდგენის საკითხის გაღრმავება, სავიზო რეჟიმის შერბილების თაობაზე მსჯელობა და კიდევ რამდენიმე მნიშვნელოვანი მიმართულება იქნება.
ამასთან, აბაშიძის თქმით, მას შემდეგ, რაც ზემოთ აღნიშნული საკითხების განხილვა სრულად ამოიწურება, მისი და კარასინის სპეციალური კომისია ქართული მხარისთვის ერთ-ერთ ყველაზე მტკივნეულ საკითხზე - ოკუპირებული ტერიტორიების მიმდებარე სოფლებში მავთულხლართების გავლების ფაქტებს შეეხება.
"სავიზო რეჟიმი საქართველოს გარკვეული კატეგორიების მოქალაქეებისთვისაც შერბილდება. ეს ხელს შეუწყობს გარკვეულწილად ურთიერთობებს. შემდგომი ეპატისთვის კი, უფრო სერიოზულ თემებზე ვიფიქრებთ.ძალიან გვაღელვებს, რაც ხდება ადმინისტრაციული საზღვრების მიდამოებში. ეს ჩვენ მემკვიდრეობად გვერგო წინა ხელისუფლებისაგან, ეს შედეგია 2008 წლის ომისა და ვფიქრობთ, რომ ამასაც ეტაპობრივად, ნელ-ნელა მივხედავთ,"- განაცხადა ზურაბ აბაშიძემ.